უკრაინის პრეზიდენტმა ვოლოდიმირ ზელენსკიმ Telegram-ზე დაწერა, რომ რუსული დარტყმები უკრაინის ქალაქებსა და სოფლებზე არც ერთი დღით არ ჩერდება.
პრეზიდენტის თქმით, ზაპოროჟიეში რუსული ავიაბომბების გამოყენებით განხორციელებული თავდასხმის შედეგად 37 ადამიანი დაშავდა, მათგან 7 საავადმყოფოში იმყოფება.
ზელენსკიმ აღნიშნა, რომ დარტყმა განხორციელდა ქალაქის სამოქალაქო ინფრასტრუქტურაზე და დაამატა, რომ „რუსები არ ზღუდავენ თავს სიცოცხლის განადგურებაში“.
„ეს არის აბსოლუტურად ცინიკური, ყოველგვარი სამხედრო აზრისგან დაცლილი ტერორისტული დარტყმა. ასეთი რუსული დარტყმები ჩვენს ქალაქებსა და სოფლებზე არც ერთი დღით არ წყდება. მხოლოდ ამ ერთმა დარტყმამ უკვე 12 ადამიანის სიცოცხლე შეიწირა. საღამოს რუსმა ნაძირლებმა დნიპროზე მიიტანეს იერიში. ამ დროისთვის ცნობილია ოთხი ადამიანის დაიღუპვის შესახებ. ვუცხადებ სამძიმარს დაღუპულთა ოჯახებსა და ახლობლებს“.
უკრაინის პრეზიდენტმა ასევე კომენტარი გააკეთა რუსეთის მიერ გამოცხადებულ „9 მაისის ზავის“ შესახებ:
„მნიშვნელოვანია, რომ რუსეთი იძულებული გახდეს შეაჩეროს ეს ომი. ცეცხლის შეწყვეტა ასეთი და სხვა დარტყმების გარეშე საჭიროა ყოველდღე და არა მხოლოდ რამდენიმე საათით სადღაც ზეიმის’ აღნიშვნისთვის“, - თქვა მან.
ზელენსკიმ ხაზი გაუსვა, რომ სიცოცხლე უნდა იყოს დაცული და მადლობა გადაუხადა ყველა პარტნიორს, ვინც უკრაინას უჭერს მხარს და ეხმარება სიცოცხლის დაცვაში.
