აშშ უკვე გარკვეული დროა განიხილავს ევროპიდან გასვლას, ამიტომ ვფიქრობ, ჩვენ უნდა გავაძლიეროთ ჩვენი უსაფრთხოება და გავზარდოთ რეაგირების შესაძლებლობები
იტალიის პრემიერ-მინისტრმა ჯორჯია მელონიმ განაცხადა, რომ ევროპის თავდაცვისუნარიანობის გაძლიერება აუცილებელია, განსაკუთრებით იმ სიგნალების ფონზე, რომლებიც აშშ-დან მოდის კონტინენტზე სამხედრო ყოფნის შესაძლო შემცირებასთან დაკავშირებით.
ევროპის პოლიტიკური საზოგადოების სამიტზე, ერევანში გამოსვლისას, მან აღნიშნა, რომ ევროპამ უნდა გაზარდოს საკუთარი რეაგირების შესაძლებლობები. იუწყბა CNN.
„ვერ გეტყვით, რა მოხდება. აშშ უკვე გარკვეული დროა განიხილავს ევროპიდან გასვლას, ამიტომ ვფიქრობ, ჩვენ უნდა გავაძლიეროთ ჩვენი უსაფრთხოება და გავზარდოთ რეაგირების შესაძლებლობები“, – განაცხადა მელონიმ.
დონალდ ტრამპის განცხადებასთან დაკავშირებით იტალიასა და ესპანეთში ამერიკული ჯარების შესაძლო შემცირების შესახებ, მელონიმ აღნიშნა, რომ ასეთ მიდგომას მხარსარ უჭერს.
„ეს არის არჩევანი, რომელიც ჩემზე არ არის დამოკიდებული და პირადად მე მას არ ვეთანხმები“, - თქვა მელონიმ.
მელონიმ ასევე კომენტარი გააკეთა აშშ-ის მხრიდან იტალიისა და ესპანეთის მიმართ გაჟღერებული ბრალდებების შესახებ, რომ ამერიკა-ისრაელის სამხედრო ოპერაციას ირანის წინააღმდეგ მათ მხარი არ დაუჭირეს. მელონის თქმით, რომი ასრულებს თავის ვალდებულებებს.
„არ ვფიქრობ, რომ ჩვენზე ნათქვამი ზოგიერთი სიტყვა სიმართლეა“, - განაცხადა მელონიმ.
ცნობისათვის, ჯერ კიდევ გასულ კვირას დონალდ ტრამპმა კითხვაზე, განიხილავდა თუ არა, გერმანიის მსგავსად, ესპანეთსა და იტალიაში დისლოცირებული კონტიგენტის გაყვანას, განაცხადა, რომ, სავარაუდოდ, განიხილავდა. ესპანეთმაც და იტალიამაც აშშ-ის შეიარაღებულ ძალებს ირანზე თავდასხმების განხორციელების მიზნით თავიანთი ბაზებით სარგებლობა შეუზღუდეს. იტალიაში ამჟამად 12 000-მდე ამერიკელი სამხედროა განთავსებული.
