უკრაინის პრეზიდენტმა ვოლოდიმირ ზელენსკიმ განაცხადა, რომ შეერთებული შტატების ყურადღების გადატანამ ახლო აღმოსავლეთზე შეამცირა ზეწოლა რუსეთზე, რაც ქმნის ომის გაჭიანურების საფრთხეს, რადგან მოსკოვი არ დათანხმდება აგრესიის შეწყვეტას ვაშინგტონის მხრიდან უფრო მკაცრი ნაბიჯების გარეშე.
ამის შესახებ ზელენსკიმ Newsmax-თან ინტერვიუში ისაუბრა.
მისი თქმით, მიუხედავად საერთო სურვილისა, ომი დასრულდეს, პრობლემა ისაა, რომ აშშ-ის პრიორიტეტები ამჟამად ახლო აღმოსავლეთზეა გადატანილი.
„ვშიშობ, რომ თუ მხოლოდ განცხადებებით შემოვიფარგლებით, რუსეთი ვერ იგრძნობს მთავარს - იმ ზეწოლას, რომელიც ამერიკას შეუძლია მოახდინოს. აშშ-ს შეეძლო სანქციებით გაეძლიერებინა ზეწოლა, თუმცა ახლა ისინი ახლო აღმოსავლეთის გამო მსუბუქდება, და ჩვენ ამას ვგრძნობთ“, - განაცხადა მან.
ზელენსკიმ აღნიშნა, რომ სამხედრო დახმარება კვლავ გრძელდება და უკრაინა ამისთვის მადლიერია, მათ შორის იმისთვისაც, რომ შეუძლია ევროპული რესურსების გამოყენება ანტიბალისტიკური რაკეტების შესაძენად. თუმცა, მისი თქმით, კრემლზე დიპლომატიური ზეწოლა შესუსტებულია.
უკრაინის პრეზიდენტმა ასევე ხაზი გაუსვა, რომ უკრაინა ყოველდღიურ კავშირშია ამერიკელ ოფიციალურ პირებთან, მაგრამ მხოლოდ სამხედრო დახმარება საკმარისი არ არის - აუცილებელია ხანგრძლივი ეკონომიკური და პოლიტიკური ზეწოლაც.
ზელენსკიმ ასევე განაცხადა, რომ უკრაინამ არ დააკმაყოფილა პარტნიორების თხოვნა, შეეწყვიტა დარტყმები რუსეთის ენერგეტიკულ ინფრასტრუქტურაზე.
„პარტნიორებისგან მივიღეთ სიგნალები, რომ ახლო აღმოსავლეთში არსებული ვითარების გამო, შესაძლოა, არ ღირდეს გარკვეული ინფრასტრუქტურის - კერძოდ, რუსეთის ენერგეტიკული ობიექტების დაბომბვა. რა თქმა უნდა, მე ვთქვი ‘არა’ - ჩვენ ვუპასუხებთ... არავის შემოუთავაზებია ჩვენთვის "ენერგეტიკული ზავი". ჩვენ ამისთვის მზად ვართ, მაგრამ თუ რუსეთი დაგვარტყამს, ჩვენ ნებისმიერ შემთხვევაში ვუპასუხებთ“, - განაცხადა მან.
ზელენსკიმ ასევე გააკრიტიკა აშშ-ის ვიცე-პრეზიდენტის, ჯეი დი ვენსის განცხადებები, რომელიც უკრაინისთვის ამერიკული დახმარების გაგრძელებას ეწინააღმდეგება. მისი თქმით, ასეთი პოზიცია რეალურად რუსეთის ინტერესებს ემსახურება.
„ჩვენ ღია ვართ და არ ვართ მტრები - მტერი არის რუსეთი. თუ ვენსი ამაყობს იმით, რომ არ გვეხმარება, ეს ნიშნავს, რომ ის რუსებს ეხმარება. რუსეთი სისუსტეს არ სცემს პატივს, და თუ არავინ დაგვეხმარება, ჩვენ, რა თქმა უნდა, უფრო სუსტ მდგომარეობაში აღმოვჩნდებით“, - განაცხადა ზელენსკიმ.
