მნიშვნელოვანია, რომ არჩევნები წარმატებული იყოს იმ მხრივ, რომ ვაკვირდებით, ბოლო ხუთ წელიწადში ეს მერვე არჩევნებია ბულგარეთში, რადგან, სამწუხაროდ, წინა პერიოდში ვერ ხდებოდა უმრავლესობის ფორმირება, ან ძალიან მოკლევადიანი იყო ხოლმე, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.
„შარშან ნოემბერში ვიყავი ბულგარეთში და მაშინ ჯერ კიდევ პრეზიდენტ რუმენ რადევს შევხვდი. უკვე ცნობილი იყო, რომ არჩევნებში მონაწილეობის მიღებას აპირებდა. იცით, რომ იანვარში გადადგა პრეზიდენტის თანამდებობიდან და როგორც ჩანს, მისი პარტია იქნება გამარჯვებული პარტია ამ არჩევნებში, მას ექნება ერთპარტიულად უმრავლესობის დაკომპლექტების შესაძლებლობა. ჩვენთვის ბულგარეთთან ორმხრივი ურთიერთობა ერთ-ერთი პრიორიტეტია შავი ზღვის რეგიონში ჩვენი ინტერესებიდან გამომდინარე და მნიშვნელოვანია, სტაბილური უმრავლესობის მქონე მთავრობა ჩამოყალიბდეს. იმედია, ასეც მოხდება.
რაც შეეხება მის პოზიციებს, ეს ხომ ნაცადი ხერხია, ეს კინო ნანახი გვაქვს. ვინც ერთ რამეში მაინც არ ეთანხმება ბრიუსელს, ყველა ირაცხება პრორუსად. ასე შერაცხეს ტრამპიც, სხვათა შორის, რამდენადაც მე ვხვდები, დიდად არ განსხვავდება მისი და ტრამპის პოზიციები. პრორუსად შერაცხეს „ქართული ოცნებაც“. ყველა, ვისაც საკუთარი თავი აბია მხრებზე და კრიტიკულს იტყვის ბრიუსელზე, ან არ ეთანხმება რამეში, ყველა პრორუსად შეირაცხა. ეს არის სპეცსამსახურების მიერ შემუშავებული პროპაგანდისტული ხერხი, როდესაც ცდილობენ, პოლიტიკური ოპონენტების წინააღმდეგ იმუშაონ“, – განაცხადა შალვა პაპუაშვილმა.
