სომხეთის დედაქალაქში ვიზიტით მყოფი საქართველოს პრემიერ-მინისტრი ნიკოლოზ გილაური სომხეთთან საზღვრის ერთობლივ მართვას იმედოვნებს.
"პოლიტიკური თანამშრომლობა უკვე შემდგარია. რაც შეეხება საზღვრის ერთობლივ მართვას, ამ საკითხზე უნდა ვიმუშავოთ. ის შედგება რამდენიმე კომპონენტისგან და ჩვენი სამუშაო ჯგუფები მასზე მუშაობენ. გასული წლის 1-ლი ივლისიდან თურქეთთან გვაქვს საზღვრის ერთობლივი მართვის გამოცდილება და ვიმედოვნებ, რომ ეს საკითხი დარეგულირდება სომხეთსა და საქართველოს შორისაც", - განაცხადა გილაურმა ერევანში გამართულ ერთობლივ პრსკონფერენციაზე.
საქართველოს პრემიერმა აღნიშნა, რომ მხარეებმა განიხილეს საინტერესო თემები, არსებული პრობლემები, ეკონომიკური საკითხები და საბაჟო პუნქტების ერთობლივი მართვის პერსპექტივები.
მისი თქმით, მხარეებმა იმსჯელეს ინფლაციასთნ ბრძოლის საკითხებზე, რომელსაც გლობალური მნიშვნელობა აქვს.
საქართველოს პრემიერ-მინისტრმა ასევე აღნიშნა რომ სომხეთსა და საქართველოს აქვთ მრავალი საერთო პროგრამა და ქვეყნები დაინტერესებულნი არიან ერთმანეთის გამოცდილების გაზიარებით.
