რუსეთს სანქციები შეიძლება ხვალვე არ დაუწესდეს, მაგრამ საერთაშორისო ზეწოლა გაძლიერდება. ამის შესახებ "ჯი-ეიჩ-ენს" ევროპასთან ინტეგრაციის საპარლამენტო კომიტეტის თავმჯდომარემ დავით დარჩიაშვილმა ევროპარლამენტის მიერ რუსეთის წინააღმდეგ შესაძლოა სანქციებზე მსჯელობის შეფასებისას აღნიშნა.
"რთული იქნება ასეთი რამის წარმოდგენა, მაგრამ შეუძლებელი არაფერია. თავის გამოსვლაში აზრს კარგად აყალიბებენ ევროპარლმენტარები, როდესაც ამბობენ, რომ გასაგებია რუსეთთან ურთიერთობის მნიშვნელობა, სტრატეგიული ინტერესების, რომლის უკან შეიძლება წარმოვიდგინოთ, როგორც ენერგეტიკა, ასევე ტერორიზმთან ბრძოლის საჭიროება, ირანზე, ახლო აღმოსავლეთზე პოზიტიურ გავლენაში დახმარება, მაგრამ ამავე დროს არის ფუნდამეტური ღირებულებები, რასაც რუსეთი არღვევს და ეს ევროპული საზოგადოებებისთვის მზარდად აუტანელი ხდება", - აღნიშნა დარჩიაშვილმა.
მისი შეფასებით, ევროპარლმენტარებს თავის ამომრჩეველთან აქვს ანგარიში ჩასაბარებელი და მათ უნდა აუხსნან, თუ არ შეიძლება მთელ რიგ რეჟიმებთან სანქციების გარეშე ურთიერთობა, იქნება ეს აფრიკაში თუ აზიაში, რატომ უნდა შეიძლებოდეს რუსეთთან სანქციების გარეშე ურთიერთობა, რომელიც ყველა საერთაშორისო სამართლის ნორმას და აღებულ ვალდებულებებს არღვევს.
"ბუნებრივია, რუსეთზე ზეწოლა გაძლიერდება, მაგრამ ბევრი რამ დამოკიდებული იქნება იმაზე, როგორ გამოსავალს იპოვის კრემლი", - დასძინა დარჩიაშვილმა "ჯი-ეიჩ-ენთან" საუბრის დროს.
შეგახსენებთ, რომ ევროპარლამენტმა რუსეთის წინააღმდეგ შესაძლოა სანქციები დააწესოს. შესაბამისი წინადადებები გუშინდელ სხდომაზე ევროპარლამენტის წევრთა მხრიდან გაჟღერდა. ისინი ითხოვენ, შეიქმნას შედეგზე ორიენტირებული სპეციალური ჯგუფი, რომლის შემადგენლობაშიც ევროპარლამენტთან ერთად, რუსეთს შინაგან საქმეთა და იუსტიციის სამინისტროების წარმომადგენლებიც შევლენ.
ევროპარლამენტის წევრების აზრით, რუსეთი მნიშვნელოვანი პარტნიორია, მაგრამ არ შეიძლება მას "მოკლული ჟურნალისტები და უფლებათა დამცველები, პოლიტიკურად ანგაჟირებული სასამართლოები და კორუმპირებული მოსამართლეები" ეპატიოს.
