აშშ-ის ვიცე-პრეზიდენტმა ჯეი დი ვენსმა განაცხადა, რომ შეერთებულ შტატებსა და ირანს შორის მოლაპარაკებებში პროგრესი არის, თუმცა მისი თქმით, დიალოგის გაგრძელება ახლა ირანულ მხარეზეა დამოკიდებული.
ამის შესახებ ვენსმა Fox News-თან ინტერვიუში ილაპარაკა.
„ეს კითხვა [მოლაპარაკებების გაგრძელების შესახებ] უმჯობესია ირანელებს დაუსვათ, რადგან ბურთი ნამდვილად მათ მხარესაა,“ - თქვა ვენსმა.
მისი თქმით, სწორედ ირანმა უნდა „გამოიჩინოს მოქნილობა“, მაშინ როცა აშშ-მა მკაფიოდ განაცხადა, რომ სურს ბირთვული მასალის ირანიდან გატანა.
„ჩვენ უნდა მივიღოთ მათგან საბოლოო დადასტურება, რომ ისინი ბირთვულ იარაღს არ შეიმუშავებენ. ვფიქრობ, თუ ირანელები მზად არიან ჩვენთან შეხვედრისთვის, ეს ორივე ქვეყნისთვის ძალიან მომგებიანი შეთანხმება შეიძლება გახდეს. თუ ისინი ამაზე არ არიან მზად, ეს მათი არჩევანია,“ -აღნიშნა ვენსმა.
ვენსის თქმით, აშშ-ის დელეგაციამ ისლამაბადი 21-საათიანი მოლაპარაკებების შემდეგ დატოვა.
„ვფიქრობ, იქ მყოფმა გუნდმა [ირანის მომლაპარაკებელთა დელეგაციამ] ვერ შეძლო შეთანხმების მიღწევა და მათ მოუწიათ თეირანში დაბრუნება, რათა ან უზენაესი ლიდერისგან, ან ვინმე სხვა პასუხისმგებელი პირისგან მიეღოთ თანხმობა იმ პირობებზე, რომლებიც ჩვენ დავაყენეთ“, - თქვა აშშ-ის ვიცე-პრეზიდენტმა .
ვენსის თქმით, მოლაპარაკებების დროს პაკისტანში „მნიშვნელოვანი პროგრესი“ იქნა მიღწეული და „ყველაფერი სწორად მიდიოდა“.
მან ასევე დაამატა, რომ შეერთებული შტატები ელოდება ირანისგან პროგრესს ჰორმუზის სრუტის გახსნის საკითხში და თუ ეს არ მოხდება, მოლაპარაკებების ხასიათი „შეიცვლება“.
ჯეი დი ვენსის განცხადებით, ირანის ხელისუფლება, ჰორმუზის სრუტეში საზღვაო მიმოსვლის დაბლოკვით, ეკონომიკური ტერორიზმის აქტს ახორციელებს.
მანს ასევე ილაპარაკა აშშ-სა და ირანს შორის გასულ კვირას გამართულ მოლაპარაკებებზე.
მათი დასრულების შემდეგ აშშ-ის პრეზიდენტმა დონალდ ტრამპმა განაცხადა, რომ ვაშინგტონმა ვერ მიაღწია შეთანხმებას თეირანთან ირანის ბირთვული პროგრამის საკითხზე.
მისივე თქმით, ირანმა არ შეასრულა დაპირება ჰორმუზის გახსნის შესახებ და აშშ ირანის წინააღმდეგ საზღვაო ბლოკადას დაიწყებს.
