მიჩვეული ვართ სახელისუფლო არჩევნებს, სადაც ვნებათაღელვაა ამა თუ იმ პოლიტიკურ პარტიებთან და კანდიდატებთან დაკავშირებით, ეს პროცესები, არ უნდა გადმოვიტანოთ საეკლესიო სულიერ ველზე, - ამის შესახებ სიონში, საპატრიარქოს საზოგადოებასთან ურთიერთობის სამსახურის წარმომადგენელმა, დეკანოზმა იაკობ მახნიაშვილმა განაცხადა.
ჟურნალისტებმა შეკითხვა დაუსვეს პატრიარქის არჩევასთან დაკავშირებით.
იაკობ მახნიაშვილის თქმით, საეკლესიო ცხოვრებაში გარე ჩარევა არ იგრძნობა.
„ჩვენ მიჩვეული ვართ სახელისუფლო არჩევნებს, სადაც ვნებათაღელვაა ამა თუ იმ პოლიტიკურ პარტიებთან და კანდიდატებთან დაკავშირებით - ეს პროცესები, არ უნდა გადმოვიტანოთ საეკლესიო სულიერ ველზე. ვფიქრობთ, სინოდი რომ დაიწყება, იხელმძღვანელებს დებულებით, რაც ეკლესიაში არსებობს, მაგრამ არავინ არ ფიქრობს, რომ სინოდი იწყება ლოცვით. ამ ლოცვაში სინოდის წევრები შესთხოვენ ღმერთს, სულიწმინდას, რათა მადლმოსილად, ღმერთის ჩარევით წარიმართოს ეს საქმე.
არის სულიერი მხარე და მაგიტომ არის ხოლმე თხოვნა მრევლისადმი, ტელევიზიებისადმი, რომ გასაგებია ვნებათაღელვა, მაგრამ იქნებ ჩვენი მოთმინებით, ამ ლოცვითი გარემოს არდარღვევით, ყველანი შევეწიოთ, რომ მართლაც ღმერთი იმოქმედებს ყველა შემთხვევაში, უბრალოდ, ჩვენ შფოთი არ შემოვიტანოთ. ღმერთი რომ არ მოქმედებდეს, 1700 წელი ეკლესია ასე მტკიცედ დღევანდელ დღემდე ვერ მოვიდოდა... არ იგრძნობა არაფერი გარე ჩარევა, აი ამ შფოთის, ჩვენი ადამიანური შფოთის გარდა, არაფერი არ იგრძნობა ეკლესიაში, რომ ვინმე რამეს ცდილობს“, - განაცხადა დეკანოზმა.
იმასთან დაკავშირებით, თუ რომელი მიტროპოლიტები აკმაყოფილებენ კრიტერიუმებს, დეკანოზმა განაცხადა, რომ პირველი სინოდი რომ ჩატარდება, იქ მოხდება ამ მუხლების სწორი, პროფესიონალური ინტერპრეტაცია .
„პირველი სინოდი რომ ჩატარდება, იქ მოხდება ამ მუხლების სწორი, პროფესიონალური ინტერპრეტაცია - ვინ რას აკმაყოფილებს და როგორ წარიმართება. ბევრი ღირსეული ადამიანია, მაგრამ როგორც გითხარით, მე პირადად, როგორც მორწმუნე ადამიანი, რიგითი წევრი და მრავალი ადამიანი, ჩვენი უწმინდესის გადაწყვეტილებას ან განცხადებულ ანდერძს, რომ მოსაყდრედ მეუფე შიო აირჩია თავისი თვისებების და უნარების გამო, დიდ პატივს ვცემთ და დიდ მნიშვნელობას ვანიჭებ“, - აღნიშნა იაკობ მახნიაშვილმა.
