პოლიტიკური ტრაგედია და დრამა არ უნდა გადაიქცეს 60 ადამიანის და მათი ოჯახების დრამად, სოციალურ დრამად. თუ მთელი ერი მიდიხართ გასაერთიანებლად, ეს 60 კაციც გაიყოლეთ, - ამის შესახებ 4 ოქტომბრის საქმეზე ბრალდებულმა, მურთაზ ზოდელავამ სასამართლო პროცესზე განაცხადა.

მისი თქმით, აქვს აღქმა, რომ კათოლიკოს-პატრიარქის გარდაცვალების ფონზე განწყობა შეიქმნა ერში, რომ ქვეყანა ერთიანდება. მისი თქმით, თუ ამ ვითარებაში პროკურატურა შეიმუშავებს კონკრეტულ კრიტერიუმებს და ადვოკატებთან ერთად შეთანხმდებიან საქმის ბრალდებულების საკითხზე, ეს სამართლიანი იქნებოდა.

„თუ ეროვნული განწყობა მართლაც არსებობს და თუ სახელმწიფო მედიაც და ხელისუფლების წარმომადგენლებიც საუბრობენ იმაზე, რომ ერი უნდა გამთლიანდეს, უნდა მოხდეს დაახლოება და რაღაცა, იქნება აი ამ 60 აბსოლუტურად ჩვეულებრივ საქართველოს მოქალაქეზე, ყოველგვარი პოლიტიკისგან ყოველთვის გამიჯნულ ადამიანებზე, არანაირი შეხება რომ არ ჰქონიათ და არც ექნებათ მომავალში, ასეთ ადამიანებზე მაინც რომ გავრცელდეს.

მე არ ვსაუბრობ იმაზე, რომ ვიღაცამ წინასააღდგომოდ ორ დღეში გაათავისუფლოს, ამაზე არ მაქვს საუბარი. საუბარია ზომიერ, თავშეკავებულ მიდგომაზე, ზომიერ, ადამიანურ, თავშეკავებულ მიდგომაზე ჩვეულებრივი მოქალაქის მიმართ. მათი ოჯახის წევრებს ხედავთ დარბაზში, სხვა არავინ არ დადის ჩვენს პროცესზე...

არ მაქვს საუბარი პოლიტიკოსებზე და ჩემს თავზე პირველ რიგში, მე ვსაუბრობ ჩვეულებრივ ადამიანებზე, ამ ადამიანების სოციალურ ტრაგედიად გადაიქცა ეს პროცესი.

არ ვგულისხმობ ხვალ და ზეგ გათავისუფლებას, უბრალოდ 4-დან 6 წლამდე მუხლით გყავდეს სამოცამდე ადამიანი, იმისთვის, რასაც მთელი საქართველო 30 წელია აკეთებს - დადის აქციაზე ან დროშის ტარით ან ქვასაც ისვრის, ასეთია საქართველოს ისტორია, ამ ადამიანებმაც იგივე გააკეთეს, რასაც მთელი საქართველო აკეთებს ჩვენი დამოუკიდებლობის ისტორიის განმავლობაში და მათ მიმართ ეს ძალიან დიდი წნეხია 225-ე მუხლის მეორე ნაწილი, სრულიად შეუსაბამო.

ამ ვითარებაში, როდესაც ასეთი განწყობაა და ეს კარგია და ვუერთდები სამძიმარს ქართველი ერის მიმართ... და თუ რიგითი ადამიანები ამ განწყობით ისარგებლებდნენ, ეს იქნებოდა ადეკვატური...

ეს პოლიტიკური ტრაგედია და დრამა არ უნდა გადაიქცეს 60 ადამიანის და მათი ოჯახების დრამად, სოციალურ დრამად. თუ მთელი ერი მიდიხართ გასაერთიანებლად, ეს 60 კაციც გაიყოლეთ“, - განაცხადა მურთაზ ზოდელავამ პროცესზე.