აშშ-ის პრეზიდენტმა დონალდ ტრამპმა განაცხადა, რომ მას შეუძლია ირანთან კონფლიქტი რამდენიმე დღეში დაასრულოს ან „ყველაფერი კონტროლქვეშ აიღოს“ და სამხედრო ოპერაცია განაგრძოს.
ამის შესახებ მან Axios-ის ჟურნალისტ ბარაკ რავიდთან სატელეფონო ინტერვიუში განაცხადა.
„შემიძლია გავწელო და ყველაფერი კონტროლს დავუქვემდებარო, ან შემიძლია ორ-სამ დღეში დავასრულო და ირანელებს ვუთხრა: „რამდენიმე წელიწადში შევხვდებით, თუ [ბირთვული და სარაკეტო პროგრამების] აღდგენას დაიწყებთ“, - თქვა მან.
ტრამპმა დასძინა, რომ ირანს, ნებისმიერ შემთხვევაში, „ამ თავდასხმის შემდეგ გონს მოსაგებად რამდენიმე წელი დასჭირდება“.
გარდა ამისა, გამოცემა წერს, რომ ტრამპმა ირანზე დარტყმის დაწყების ორი ძირითადი მიზეზი დაასახელა. პირველი მისი წარმომადგენლების, სტივ უიტკოფისა და ჯარედ კუშნერის მიერ წარმოებული მოლაპარაკებების ჩაშლაა.
„ირანელები მოახლოვდნენ და შემდეგ უკან დაიხიეს — ისინი მოახლოვდნენ და შემდეგ უკან დაიხიეს. ამის შემდეგ სწორედ ამას მივხვდი: მათ სინამდვილეში შეთანხმება არ სურთ“, - თქვა ტრამპმა.
მეორე მიზეზი, როგორც აღნიშნულია, ირანის ქცევა იყო ბოლო რამდენიმე ათწლეულის განმავლობაში.
ტრამპმა განაცხადა, რომ თავის გუნდს სთხოვა შეეგროვებინა ყველა ინფორმაცია ირანის მიერ ბოლო 25 წლის განმავლობაში განხორციელებული თავდასხმების შესახებ.
„მე ვხედავდი, რომ ყოველთვიურად ისინი რაღაც ცუდს აკეთებდნენ, რაღაცას აფეთქებდნენ ან ვინმეს კლავდნენ“, - განუცხადა მან Axios-ს.
ტრამპმა ასევე გაიხსენა, რომ ირანმა დაიწყო იმ ბირთვული ობიექტების აღდგენა, რომლებსაც აშშ-მა და ისრაელმა 2025 წლის ივნისში 12-დღიანი ომის დროს შეუტიეს.
გამოცემა აღნიშნავს, რომ აშშ-ის პრეზიდენტმა რამდენჯერმე გაიმეორა, რომ ირანის წინააღმდეგ გასული წლის ოპერაციის დაწყების გადაწყვეტილებამ, რომლის დროსაც ირანის სამი ბირთვული ობიექტი განადგურდა ან მნიშვნელოვნად დაზიანდა, შესაძლებელი გახადა მიმდინარე ოპერაციის განხორციელება.
მან თქვა, რომ ივნისში აშს-ის დარტყმი რომ არ განეხორვიელებინა. ირანს შესაძლოა უკვე შეექმნა ბირთვული იარაღი, რაც უკანასკნელ თავდასხმას შეუძლებელს გახდიდა.
