შეხვედრაზე მხარეებმა ქვეყნებს შორის სოფლის მეურნეობის და გარემოს დაცვის მიმართულებით მიმდინარე პროექტები და სამომავლო თანამშრომლობის საკითხები განიხილეს.
მინისტრმა მადლობა გადაუხადა შვეიცარიის კონფედერაციის მთავრობას და ელჩს მრავალწლიანი მხარდაჭერისა და ნაყოფიერი თანამშრომლობისთვის.
როგორც დავით სონღულაშვილმა განაცხადა, კლიმატის ცვლილებაზე ადაპტაციის, ტყის რესურსების მდგრადი მართვის, პროფესიული განათლების სისტემის გაუმჯობესებისა და ცხოველთა რეგისტრაციისა და მიკვლევადობის მიმართულებით განხორციელებულმა პროექტებმა ხელი შეუწყო სექტორების ეფექტიანობის ზრდასა და საერთაშორისო პრაქტიკასთან დაახლოებას.
მინისტრის განაცხადებით, მიღწეული პროგრესის გასაღრმავებლად და მდგრადი შედეგების უზრუნველსაყოფად, მნიშვნელოვანია თანამშრომლობის გაგრძელება, მათ შორის ტყის მასივების ხელოვნური განაშენიანებისა და აგროდაზღვევის შვეიცარული სისტემის გაზიარების მიმართულებებით.
ჰაიდი გრაუს განცხადებით, შვეიცარია ქვეყნის მხარდაჭერას შესაბამისი მიმართულებებით მომავალშიც აქტიურად გააგრძელებს.
გარემოს დაცვისა და სოფლის მეურნეობის სამინისტროში გამართულ შეხვედრას მინისტრის პირველი მოადგილე ნინო თანდილაშვილი, შვეიცარიის ელჩის მოადგილე ჟაკლინ იაკობი, საქართველოში შვეიცარიის საელჩოს სამხრეთ კავკასიის თანამშრომლობის რეგიონული დირექტორი ბარბარა ბონი ესწრებოდნენ.
