დონალდ ტრამპმა ამერიკის უზენაესი სასამართლოს მიერ ტარიფებთან დაკავშირებით მიღებულ გადაწყვეტილებას „სირცხვილი“ უწოდა, თუმცა განაცხადა, რომ მას სარეზერვო გეგმა აქვს. იუწყება CNN
ორი წყაროს ცნობით, ტრამპმა ეს განცხადება თეთრ სახლში გუბერნატორებთან ერთად საუზმის დროს გააკეთა.
ტრამპის ადმინისტრაციის წარმომადგენლები უზენაეს სასამართლოში დამარცხებისთვის ემზადებოდნენ და პრეზიდენტს არწმუნებდნენ, რომ თუ სასამართლო მის მიერ დაწესებულ ტარიფებს გააუქმებდა, მათი განხორციელების სხვა გზებიც იარსებებდა.
„ბოლო კვირებში პრეზიდენტი პირად საუბრებში გაღიზიანებით ჩიოდა, რომ უზენაესი სასამართლო გადაწყვეტილების მიღებას ძალიან აჭიანურებს“, - თქვა ერთ-ერთმა წყარომ.
წყაროს თქმით, ტრამპი ასევე მუდმივად ფიქრობდა იმაზე, თუ რა გადაწყვეტილებას მიიღებდა სასამართლო.
ერთ მომენტში ტრამპმა განაცხადა, რომ არ ფიქრობს, რომ უზენაესი სასამართლო ტარიფების წინააღმდეგ გადაწყვეტილებას გამოიტანს, იმის გათვალისწინებით, თუ რამდენი რამ იდო სასწორზე.
შეგახსენებთ, აშშ-ის უზენაესმა სასამართლომ დონალდ ტრამპის მიერ დაწესებული ტარიფები გააუქმა.
