აშშ-ის პრეზიდენტმა დონალდ ტრამპმა განაცხადა, რომ ირანის ირგვლივ არსებული ვითარება მომდევნო 10 დღეში გაირკვევა.
ამის შესახებ ტრამპმა ვაშინგტონში, «მშვიდობის საბჭოს“ სამიტზე განაცხადა.
„მშვიდობის საბჭოს“ პირველ სამიტზე, რომელშიც დაახლოებით 20 ქვეყნის წარმომადგენელი შეიკრიბა, ტრამპმა ჩამოთვალა მისი, როგორც პრეზიდენტის, მიღწევები, კერძოდ, ბევრი ახლო აღმოსავლეთში მშვიდობის დამყარების შესახებ ილაპარაკა.
„ამიტომ, ახლა შეიძლება კიდევ ერთი ნაბიჯის გადადგმა მოგვიწიოს, ან შეიძლება არა. შესაძლოა შეთანხმებას მივაღწიოთ. ამის შესახებ, სავარაუდოდ, მომდევნო 10 დღის განმავლობაში გაიგებთ“, - თქვა ტრამპმა.
მან თქვა, რომ აშშ-ირანის მოლაპარაკებები „კარგი“ იყო, მაგრამ მხარეებმა შეთანხმებას უნდა მიაღწიონ, თორემ „ცუდი რამ“ მოხდება.
„როგორც იცით, კარგი მოლაპარაკებები მიმდინარეობს. წლების განმავლობაში დადასტურდა, რომ ირანთან მნიშვნელოვანი შეთანხმების მიღწევა ადვილი არ არის. ჩვენ უნდა დავდოთ მნიშვნელოვანი შეთანხმება, თორემ ცუდი რამ მოხდება“, - თქვა ტრამპმა.
