რუსეთს დონბასის სრული ოკუპაციისთვის კიდევ ორი წელი სჭირდება. როგორც ჩანს, კრემლი ამ გათვლების შესახებ კარგად ინფორმირებულია და მზადაა, ამ სცენარით ომი გააგრძელოს. The New York Times-ის ცნობით, დასავლური სადაზვერვო სააგენტოები ვარაუდობენ, რომ ვლადიმირ პუტინი მიიჩნევს, რომ უკრაინასთან ომს იგებს.
„ის დარწმუნებულია, რომ დონბასზე სრული კონტროლის დამყარებას 18 თვიდან ორ წლამდეც კი დასჭირდება, ბრძოლის ყოველი დღე და ყოველი ღამე, როდესაც რუსული რაკეტები და დრონები ენერგეტიკულ ინფრასტრუქტურასა და საცხოვრებელ შენობებს ეცემა, მას უფრო დიდ უპირატესობას ანიჭებს“, - წერს გამოცემა.
ამავდროულად, გამოცემა აღნიშნავს, რომ რუსეთის ეკონომიკა ბოლო თვეების განმავლობაში ღრმა პრობლემებს აწყდება, ხოლო დონალდ ტრამპი ომის დასრულების შემთხვევაში კრემლს რუსეთში მსხვილ ინვესტიციებს სთავაზობს.
„ამ დინამიკის გათვალისწინებით, ზოგიერთი ანალიტიკოსი ვარაუდობს, რომ ბატონ პუტინს კვლავ შეუძლია უკრაინაში საბრძოლო მოქმედებების დასრულების შეთანხმების მიღწევა, განსაკუთრებით თუ ის უზრუნველყოფს შეერთებულ შტატებთან ფართომასშტაბიან დაახლოებას და უკრაინული ჯარების დონბასის დანარჩენი ნაწილიდან გაყვანას“, - წერს NYT.
როგორც უკრაინული მედია იტყობინება, რუსეთი დაჟინებით ითხოვს დონბასის მისთვის გადაცემას, რათა კრემლმა რუსებს ომის ნადავლის სახით მაინც რაღაც წარუდგინოს. ამავდროულად, უკრაინის პრეზიდენტმა არაერთხელ გაუსვა ხაზი, რომ ის დონბასს რუსეთს არ გადასცემს.
ზელენსკი ასევე აღნიშნავს, რომ დონბასის სრული ოკუპაცია რუსეთს დამატებით 800 000 ჯარისკაცს დააკარგვინებს და ორ წელს წაართმევს. ზელენსკის თქმით, რუსეთის ეკონომიკა ამდენ ხანს ვერ გაუძლებს.
