გადაწყვეტილება თავდაპირველად იმაზე ადრე მიიღო, ვიდრე "ქართული ოცნების" მთავრობა სურსათის გაიაფების საკითხს წამოჭრიდა. როგორც მან ფასების საპარლამენტო კომისიის პირველ სხდომაზე განაცხადა, იანვრიდან კვერცხის გაძვირება და შემდეგ, თებერვლიდან მისი გაიაფება არ ნიშნავს, რომ კომპანიებს მოგების მაღალი მარჟა აქვთ.
"ადგილობრივი წარმოება ვართ, ოღონდ მთლიანად, 100%-ით იმპორტზე ვართ დამოკიდებული, აბსოლუტურად. მარტო ელექტროენერგია, წყალი და ჰაერი არის ჩვენი, დანარჩენი არის ყველაფერი შემოტანილი. მომავალი წლისთვის ჩვენი კვერცხის ფასი ყოველთვის ოქტომბრის თვეში დგება, როცა იწყება რუსეთიდან ხორბლის და სიმინდის შესყიდვა. ტენდენციას ვუყურებთ, რა სიტუაცია არის. ძალიან ბევრ რამეზეა ეს დამოკიდებული: აქციზები, ამინდი, ფასი, მოსავალი და ყველაფერი.
შემდეგ, ჩვენ გვაქვს კონკრეტული შეთანხმება სუპერმარკეტებთან, რომ ერთი თვით ადრე უნდა მივწეროთ კვერცხის გაძვირების შესახებ. რაც მოხდა წელსაც: მივწერეთ სუპერმარკეტებს, რომ არ გვინდოდა ახალ წლისთვის კვერცხის გაძვირება და გავაძვირეთ 9 იანვრიდან. 25 დეკემბერს გამოვიდა ბატონი პრემიერი ამ საკითხთან დაკავშირებით, და ისე გამოჩნდა, თითქოს რაღაც საბოტაჟთან გვქონდა საქმე. კიდევ კარგი, მქონდა საშუალება ბატონ პრემიერთან პირადად აგვეხსნა ეს სიტუაცია, თუ რატომ მოხდა ეს ყველაფერი. და შესაბამისი ნაბიჯიც გადავდგით საიმისოდ, რომ ძველ ფასს დავბრუნებოდით. სწორად გამიგეთ, იმიტომ არ დავუბრუნდით ძველ ფასს, რომ ჩვენ დიდი მარჟა გვქონდა. უბრალოდ დავუბრუნდით ჩვენი მოგების ხარჯზე", - განაცხადა გია ლობჟანიძემ.
"დილას" დირექტორმა კომისიის სხდომაზე კიდევ ერთხელ დაადასტურა, რომ კვერცხი გარდაუვალი აუცილებლობის გამო გაძვირდა და ამჟამად არც დარგს და - არც თავად კომპანიას - პროდუქტის გაიაფების შესაძლებლობა აღარ აქვს.
"მე როგორც კრიტიკული მართვის მენეჯერი ვერ დაუშვებ იმას, რომ დარგი და ჩემი წარმოება იყოს დაუცველი და კონკრეტულად არ ვიშოვო იმდენი ფული, რომ მეყოს იმისთვის, რომ ეს დარგი რისკების გარეშე ვამუშაო. მით უმეტეს, რომ დღესდღეობით ეპიდემიოლოგიური კუთხით ძალიან ცუდი ვითარება არის ჩვენ ირგვლივ ქვეყნებში, და ძალიან დიდი ყურადღებით ვაკვირდებით ამას. ამისთვისაც მზად უნდა ვიყოთ.
ამიტომ სრული პასუხისმგებლობით ვაცხადებ: ჩვენ რომ გავაძვირეთ კვერცხი, ეს იყო გარდაუვალი აუცილებლობა. ახლაც სრული პასუხისმგებლობით ვაცხადებ, რომ დარგს, კონკრეტულად ჩემს საწარმოს, კვერცხის ერთი თეთრით გაიაფების საშუალება არ აქვს. თუკი იქნება კომპლექსური მიდგომა და, კომპლექსური მიდგომის შემთხვევაში, გადასახადები დაიწევს, მაშინ, რა თქმა უნდა, [პროდუქტი გაიაფდება]", - განაცხადა გია ლობჟანიძემ. [BMG]
