უნგრეთის პრემიერ-მინისტრმა ვიქტორ ორბანმა უკრაინას უნგრეთის მტერი უწოდა.
ამის შესახებ ორბანმა ქალაქ სომბატჰეიში გამართულ „ომის საწინააღმდეგო“ მიტინგზე განაცხადა.
უნგრეთის მთავრობის მეთაურის თქმით, უკრაინა მუდმივად მოითხოვს, რომ ბრიუსელმა უნგრეთს იაფი რუსული ენერგორესურსები ჩამოართვას, რაც უნგრელებისთვის კომუნალური მომსახურების მაღალ ფასებს ემუქრება.
„ნებისმიერი, ვინც ამას ამბობს, უნგრეთის მტერია, ამიტომ უკრაინა ჩვენი მტერია“, - თქვა ორბანმა.
მან დასძინა, რომ კომუნალური გადასახადების შემცირების გარეშე, უნგრული ოჯახებისთვის კომუნალური ხარჯები წელიწადში 1 მილიონი ფორინტით (დაახლოებით 2600 ევროთი) გაიზრდება.
ორბანმა ასევე განაცხადა, რომ რადგან უკრაინა უნგრეთის მეზობელია, მას მოუწევს მასთან თანამშრომლობა, მაგრამ მას ევროკავშირში გაწევრიანების უფლება არ უნდა მიეცეს.
