შვედეთი და დანია ერთობლივად გამოყოფენ უკრაინისთვის 2.6 მილიარდი შვედური კრონის (246 მილიონი ევრო) ღირებულების დახმარების პაკეტს, რომელიც მოიცავს საჰაერო თავდაცვის აღჭურვილობას.
სისტემები უკვე წარმოების ეტაპზეა და უკრაინაში რამდენიმე თვეში გაიგზავნება. ამის შესახებ შვედური საზოგადოებრივი მაუწყებელი SVT იუწყება.
გავრცელებული ინფორმაციით, შვედეთი Tridon Mk2 სისტემების შესაძენად თითქმის 200 მილიონ ევროს გამოყოფს.
ეს არის შვედური წარმოების საზენიტო-სარაკეტო სისტემები, რომლებიც განსაკუთრებით ეფექტურია დრონების ჩამოგდებაში.
„მას (კომპლექსს) შეუძლია დრონების, ფრთოსანი რაკეტების და ვერტმფრენების ჩამოგდებაც კი.
„ეს არის შესაძლებლობა, რომელიც უკრაინას სჭირდება იმის გათვალისწინებით, რომ რუსეთის შორი დისტანციის დარტყმები ამჟამად ძალიან ინტენსიურია მთელი ქვეყნის მასშტაბით“, - განაცხადა შვედეთის თავდაცვის მინისტრმა პოლ იონსონმა.
ეს სისტემები სპეციალურად იქნება ადაპტირებული დრონებისა და სხვა საჰაერო საფრთხეების მოკლე დისტანციაზე ჩამოსაგდებად.
დანია Tridon Mk2-ში 40 მილიონ ევროზე მეტს ინვესტირებას ახორციელებს.
უკრაინისთვის შეძენილი სისტემების ზუსტი რაოდენობა კონფიდენციალურია, თუმცა შვედეთის ოფიციალური პირების თქმით, ის საჰაერო თავდაცვის ბატალიონის საჭიროებებს დააკმაყოფილებს.
სისტემები უკვე წარმოების ეტაპზეა და უკრაინაში მათ მიწოდებას რამდენიმე თვეში გეგმავენ.
