სომხეთ-აზერბაიჯანის კონფლიქტის მოგვარებაში ამერიკამ სერიოზული ნაბიჯები გადადგა, ჯეი დი ვენსის აზერბაიჯანსა და სომხეთში ჩამოსვლაც ამის განმტკიცებას ემსახურება, – ამის შესახებ საპარლამენტო უმრავლესობის წევრმა, თენგიზ შარმანაშვილმა განაცხადა.
„კარგად იცით, რომ ის მშვიდობის განსამტკიცებლად ჩამოდის. დონალდ ტრამპმა განაცხადა, რომ არ სურს, მის მიერ დარეგულირებული საკითხები დროებითი იყოს. მას სურს, ეს საკითხები ხანგრძლივი დროის განმავლობაში გადაიჭრას. რა თქმა უნდა, მთელ მსოფლიოში ერთ-ერთი ურთულესი კონფლიქტი სომხეთ-აზერბაიჯანის კონფლიქტი იყო. ამ კონფლიქტის მოგვარებაში ვინ აღარ ჩაერია, ბევრი ფორმატიც შეიქმნა და ვერცერთი ნაბიჯი გადაიდგა წინ – ეს კონფლიქტი ჩაცხრებოდა და გაღვივდებოდა. რა თქმა უნდა, ამერიკამ სერიოზული ნაბიჯები გადადგა და ტრამპს ამ საკითხში დიდი დამსახურება აქვს. ჯეი დი ვენსის ჩამოსვლაც ამის განმტკიცებას ემსახურება და ამას მივესალმებით.
ჩვენი მეზობლები რაც უფრო მშვიდობიანად იქნებიან ერთმანეთთან, რეგიონის განვითარება უფრო პერსპექტიული იქნება. ყველამ კარგად იცის და ნებისმიერი ეკონომისტი გეტყვით, რომ ისეთი რაოდენობის ტვირთებზეა ლაპარაკი, ზანგეზურის დერეფანი ვერანაირი განვითარებით ვერ გაატარებს. საქართველო მაინც იქნება ერთ-ერთი მთავარი სატრანსპორტო ჰაბი. დარწმუნებული ვარ, აშშ თავისი რეგიონული პოლიტიკის განსაზღვრისას, ამ საკითხში საქართველოს როლზეც ჩამოყალიბდება. მიმაჩნია, რომ ახლა ბოლომდე ჩამოყალიბებული არ აქვს. რა თქმა უნდა, თავის წინადადებებს ყოველგვარი მიკიბვ-მოკიბვის გარეშე შემოგვთავაზებს. ტრამპს ეს ახასიათებს. მზად როცა იქნება, გვეტყვიან. ჩვენც მზად ვიქნებით ამ ურთიერთობაში“, – განაცხადა თენგიზ შარმანაშვილმა.
აშშ-ის ვიცე-პრეზიდენტი ჯეი დი ვენსი თებერვალში აზერბაიჯანსა და სომხეთს ეწვევა. როგორც აშშ-ის პრეზიდენტი სოციალურ ქსელში წერს, ვენსი სომხეთსა და აზერბაიჯანში სამშვიდობო ძალისხმევის გასაძლიერებლად გაემგზავრება.
