გარემოს დაცვისა და სოფლის მეურნეობის მინისტრის მოადგილე ლაშა ავალიანი რძის სექტორის განვითარების საკითხებზე დარგის წარმომადგენლებს შეხვდა. შეხვედრაზე მინისტრის მოადგილემ 2026 წელს სექტორში დაგეგმილი მნიშვნელოვანი სიახლეები გააცნო, მათ შორის, პირველადი წარმოებისა და ცხოველთა გადაადგილების კონტროლის მექანიზმების გამკაცრება, ასევე ვეტერინარული რეცეპტების ეტაპობრივი ამოქმედების მექანიზმის დანერგვა.
უწყების ცნობით, შეხვედრაზე განიხილეს ნედლ რძეში აფლატოქსინის ზღვრული ნორმის საკითხიც, ასევე იმსჯელეს ნედლი რძის წარმოების წახალისების მექანიზმებზე.
„მერძეული სექტორის ინიციატივით გაიმართა შეხვედრა დარგის წარმომადგენლებთან, როგორც პირველად მწარმოებლებთან, ასევე გადამმუშავებლებთან. განვიხილეთ რამდენიმე მიმდინარე საკითხი და ის გამოწვევები, რომლებიც დღეს ბაზარზე და მთლიანად სექტორში არსებობს. ვისაუბრეთ სამომავლო გეგმებზე, რომელთა განხორციელება მიმდინარე წლიდან დაიწყება და რომლებიც ხელს შეუწყობს როგორც ადგილობრივი სექტორის განვითარებას, ასევე საბოლოო მომხმარებლის უკეთ ინფორმირებას“, - განაცხადა ლაშა ავალიანმა.
როგორც უწყყებაში აცხადებენ, რძის სექტორის წარმომადგენლები მსგავსი ფორმატის შეხვედრებს დადებითად აფასებენ და აღნიშნავენ, რომ დარგში არსებული გამოწვევების დასაძლევად სახელმწიფოსთან რეგულარული კომუნიკაცია და შეთანხმებული გადაწყვეტილებების მიღება აუცილებელია.
„საინტერესო შეხვედრა გაიმართა გარემოს დაცვისა და სოფლის მეურნეობის სამინისტროსა და რძის ინდუსტრიის წარმომადგენლებს შორის. ჩვენთვის, როგორც ასოციაციისთვის, ეს შეხვედრა იმედის მომცემია, განსაკუთრებით იმ ფონზე, რომ გაჟღერდა მუდმივმოქმედი კომიტეტებისა და სამუშაო ჯგუფების შექმნის ინიციატივა, რომლებიც მომავალში იმ მნიშვნელოვან და აქტუალურ საკითხებზე იმუშავებენ, რაც დარგს დღეს ყველაზე მეტად აღელვებს. შეხვედრის ფარგლებში დავინახეთ კიდევ ერთი მნიშვნელოვანი ფაქტორი - სამინისტრო მზად არის, ერთი მხრივ, წარმოადგინოს საკუთარი ხედვა და წინადადებები დარგის განვითარების და კონტროლის მექანიზმების გაუმჯობესების მიმართულებით, ხოლო მეორე მხრივ, მოუსმინოს სექტორში არსებულ პრობლემებსა და წინადადებებს. დარწმუნებულები ვართ, რომ ერთობლივი მუშაობის შედეგად შესაძლებელი იქნება წარმატებული და ეფექტიანი ნაბიჯების გადადგმა“, - აღნიშნა რძისა და რძის პროდუქტების მწარმოებელთა ასოციაციის ხელმძღვანელმა კახა კონიაშვილმა.
გარემოს დაცვისა და სოფლის მეურნეობის სამინისტროში გამართულ შეხვედრას ასევე ესწრებოდნენ სურსათის ეროვნული სააგენტოს უფროსი გიორგი იაკობაშვილი, მერძევეთა ასოციაციის თავმჯდომარე ნიკოლოზ ბენიაიძე და ყველის მწარმოებელთა ასოციაციის თავმჯდომარე ანა მიქაძე-ჩიკვაიძე.
