NBC News-თან ინტერვიუში აშშ-ის პრეზიდენტმა დონალდ ტრამპმა განაცხადა, რომ ვენესუელაში არჩევნები სულ მცირე მომდევნო 30 დღის განმავლობაში არ ჩატარდება. მან განაცხადა, რომ ქვეყანას პირველ რიგში „განკურნება“ სჭირდება და რომ აღდგენის პროცესს შეიძლება 18 თვემდე და მნიშვნელოვანი ფინანსური რესურსები დასჭირდეს.
ტრამპმა აღნიშნა, რომ ვაშინგტონის შეფასებით, ეს ხარჯები შემდგომში შეიძლება კომპენსირებული იყოს ვენესუელის ნავთობის შემოსავლებით. ამავდროულად, მან განაცხადა, რომ შეერთებული შტატები ამ ქვეყანასთან ომში არ იმყოფება.
„არა, ჩვენ ომში არ ვართ. ჩვენ ომში ვართ ნარკომოვაჭრეებთან და იმ ადამიანებთან, რომლებიც ანგრევენ მათ ციხეებს და ჩვენს ქვეყანაში აგზავნიან ნარკომანებსა და ფსიქიკურად დაავადებულ ადამიანებს“, - განაცხადა აშშ-ის პრეზიდენტმა.
მან ასევე განაცხადა, რომ ვენესუელის ვიცე-პრეზიდენტი დელსი როდრიგესი, რომელმაც ნიკოლას მადუროს თანამდებობიდან გადაყენების შემდეგ ფაქტობრივად ქვეყნის მართვა დაიწყო, ამჟამად აშშ-ის მთავრობასთან თანამშრომლობს.
ტრამპის თქმით, ვენესუელაში მიმდინარე პროცესებს გააკონტროლებს მაღლჩინოსნების ჯგუფი, მათ შორის სახელმწიფო მდივანი მარკო რუბიო, თავდაცვის მდივანი პიტ ჰეგსეთი, თეთრი სახლის ადმინისტრაციის უფროსის მოადგილე სტივენ მილერი და ვიცე-პრეზიდენტი ჯეი დი ვენსი.
ამავდროულად, აშშ-ის პრეზიდენტმა არ გამორიცხა ვენესუელაში სამხედრო ოპერაციის განმეორებით ჩატარება, თუ კარაკასის ახალი ხელისუფლება ვაშინგტონთან თანამშრომლობას შეწყვეტს.
„ჩვენ ამისთვის მზად ვართ. სინამდვილეში, ჩვენ ამას მთელი ამ ხნის განმავლობაში ვგეგმავდით“, - განაცხადა ტრამპმა შესაძლო განმეორებითი შეჭრის შესახებ დასმული კითხვის საპასუხოდ.
მისი თქმით, ასეთი სცენარი ნაკლებად სავარაუდოა, მაგრამ შესაძლოა განხორციელდეს, თუ ვენესუელის ხელმძღვანელობა უარს იტყვის აშშ-ის მოთხოვნების შესრულებაზე.
