მოკლული მასწავლებლის, გიგა ავალიანის ოჯახი პროკურატურას 2-კვირიან ვადას აძლევს იმისთვის, რათა „შეუძლებელი შეძლონ“, საქმე გამოიძიონ და დამნაშავეები დასაჯონ.
გიგა ავალიანის დედა გენერალურ პროკურატურასთან საპროტესტო აქცის გამართა. მას სოლიდარობა მოქალაქეებმა შვილის მოსწავლეებსა და მათ მშობლებთან ერთად გამოუცხადეს. ეკა კუპატაძე პროკურატურას გულგრილობასა და მტკიცებულებების გაყალბებაში ადანაშაულებს. ოჯახი უკვე რამდენიმე თვეა საქმის მასალების გადაცემას ითხოვს და საქმის სტრასბურგის სასამართლოში გასაგზავნად ემზადება.
„გიგა ავალიანის სიცოცხლე არ იყიდება. მე ვიბრძოლებ სიცოცხლის ბოლო წამამდე და ყველას დავსვამ საბრალდებო სკამზე, ვისაც რამე გადაცდომა აქვს გიგას მკვლელობასთან მიმართებაში. არ დავზოგავ არავის არც სრულწლოვანს, არც არასრულწლოვანს, მიუხედავად სქესისა, ვისაც იოტისოდენა შემხებლობა მაინც აქვს, ყველა დაჯდება საბრალდებო სკამზე. პროკურატურის წამმზომი ჩართულია. 1-ელ ოქტომბერს მკვლელებმა მარტო მე და გიგას კი არ გამოგვიტანეს განაჩენი, ამათაც გამოუტანეს განაჩენი. ...არც ერთი ადამიანის სიცოცხლე არ არის უბრალო. მაგრამ ვციტირებ პროკურორ ზუკა გამყრელიძის სიტყვებს: უბრალო საქმე იყო, რომ არ გეყვირათო. ვიმეორებ, არც ერთი ადამიანის სიცოცხლე არ არის უბრალო, მაგრამ რადგან ასე მოიხსენია პროკურორმა, დიახ! გიგა ავალიანის სიცოცხლე არ იყო უბრალო და მე ამას ასე უბრალოდ არ დავასრულებ", - განაცხადა ეკა კუპატაძემ საპროტესტო აქციაზე.
ცნობისთვის, გიგა ავალიანის გარდაცვალების საქმეზე სამართალდამცავებმა ჯამში 4 პირი დააკავეს. მათგან ალექსანდრე გაბაშვილს საქართველოს სისხლის სამართლის კოდექსის 117-ე მუხლის მე-2 ნაწილით წარედგინა ბრალდება, რაც ჯანმრთელობის განზრახ მძიმე დაზიანებას გულისხმობს, რამაც გამოიწვია სიცოცხლის მოსპობა, ხოლო გიორგი რიკაძეს და კიდევ ორ არასრულწლოვანს ბრალდება სისხლის სამართლის კოდექსის 376-ე მუხლის პირველი ნაწილით წარედგინათ, რაც დანაშაულის შეუტყობინებლობას გულისხმობს იმის მიერ, ვინც ნამდვილად იცის, რომ მზადდება და ჩადენილია მძიმე დანაშაული.
