საქართველოს გარემოს დაცვისა და სოფლის მეურნეობის მინისტრი დავით სონღულაშვილი ნაირობიში, გაეროს გარემოსდაცვითი ასამბლეის მეშვიდე სესიის (UNEA-7) ფარგლებში, კენიის რესპუბლიკის გარემოს დაცვის, კლიმატის ცვლილებისა და სატყეო მეურნეობის მინისტრ დებორა მლონგო ბარასს შეხვდა.
შეხვედრაზე ყურადღება გამახვილდა კლიმატის ცვლილებების ფონზე გარემოს დაცვის მიმართულებით ქვეყნებს შორის პარტნიორული ურთიერთობის განვითარების მნიშვნელობაზე.
დავით სონღულაშვილმა ყურადღება გაამახვილა საქართველოში მიმდინარე გარემოსდაცვით რეფორმებზე.
„ეროვნული გარემოსდაცვითი სისტემის რეფორმირების პროცესში საქართველოს მთავრობის მთავარი მიზანი ჩვენი მოქალაქეებისთვის გარემოპირობების გაუმჯობესება და, ამავდროულად, საერთაშორისო ვალდებულებების ზედმიწევნით შესრულებაა. გრძელვადიანი გარემოსდაცვითი გადაწყვეტილებები, იქნება ეს ცირკულარულ ეკონომიკაზე გადასვლის დაჩქარება თუ გარემოს დაბინძურების შემცირება, შესაძლებელია მხოლოდ მაშინ, როცა სახელმწიფო ქმნის მშვიდობიან, მდგრად და უსაფრთხო პოლიტიკურ გარემოს, სადაც ნებისმიერ სექტორს შეუძლია განვითარებაზე ზრუნვა და ინოვაციებზე მუშაობა“, - განაცხადა დავით სონღულაშვილმა.
შეხვედრაზე საუბარი შეეხო ქვეყნებს შორის თანამშრომლობის მნიშვნელობას. პოტენციურ მიმართულებებად დასახელდა კლიმატის მდგრადობა, მდგრადი სატყეო მეურნეობა, ბიომრავალფეროვნება, დაცული ტერიტორიების მართვა.
კენიის გარემოს დაცვის, კლიმატის ცვლილებისა და სატყეო მეურნეობის მინისტრმა მზადყოფნა გამოთქვა, საქართველოსთან თანამშრომლობის გააქტიურების და გამოცდილების გაზიარების კუთხით, მათ შორის, დაცული ტერიტორიებისა და სატყეო სექტორის მართვის გეგმების შემუშავების მიმართულებებით.
საქართველოსა და კენიის რესპუბლიკის უწყებები მომავალშიც გააგრძელებენ მუშაობას პარტნიორობის გაღრმავებისა და საერთო გარემოსდაცვითი მიზნების წინსვლისთვის.
დავით სონღულაშვილმა კენიის გარემოს დაცვის, კლიმატის ცვლილებისა და სატყეო მეურნეობის მინისტრი საქართველოში ოფიციალურად მოიწვია.
