გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი ქალაქ სტამბოლში გამართულ მინისტერიალს „სურსათისა და წყლის ნარჩენების პრევენცია - მომავლის დაცვა“ დაესწრო და პანელურ დისკუსიაში მიიღო მონაწილეობა. ნინო თანდილაშვილმა ყურადღება გაამახვილა იმ საკანონმდებლო და სტრუქტურულ რეფორმებზე, რომლებიც საქართველომ ბოლო წლებში განახორციელა.
„საქართველო მნიშვნელოვან ნაბიჯებს დგამს საკვების ნარჩენებისა და წყლის რესურსების მდგრადი მართვის მიმართულებით. 2023 წლიდან მოქმედი კანონი „სურსათის დანაკარგებისა და ნარჩენების შემცირების და სურსათის შეწირულობის შესახებ“ ქმნის ყოვლისმომცველ ჩარჩოს, რომელიც უზრუნველყოფს საკვების დანაკარგის შემცირებას, დონაციის ხელშეწყობასა და რესურსების ეფექტიან გამოყენებას. ამავდროულად, საქართველოს მიერ განხორციელებული წყლის რესურსების მართვის რეფორმა, ევროკავშირის წყლის ჩარჩო დირექტივის საფუძველზე, აწესებს მდინარეების აუზებზე დაფუძნებულ მართვის მოდელს. ახალი კანონმდებლობა განაპირობებს წყლის სამართლიან და უსაფრთხო გამოყენებას. საქართველო ქმნის ინტეგრირებულ და მდგრად სისტემას, რომელიც ამცირებს წყლისა და საკვების ფლანგვას, უზრუნველყოფს მოსახლეობისთვის უსაფრთხო საკვებისა და წყლის ხელმისაწვდომობას“, - აღნიშნა ნინო თანდილაშვილმა.
მინისტერიალი თურქეთის რესპუბლიკის სოფლის მეურნეობისა და სატყეო სამინისტროს ორგანიზებითა და თურქეთის პირველი ლედის, ემინე ერდოღანის პატრონაჟით გაიმართა.
მინისტერიალი გაეროს გენერალური ასამბლეის 2022 და 2023 წლებში მიღებული რეზოლუციების კონტექსტში გაიმართა, რომლებმაც ნულოვანი ნარჩენები და საკვები ნარჩენების პრევენცია 2030 წლის დღის წესრიგის ერთ-ერთ უმნიშვნელოვანეს პრიორიტეტად განსაზღვრა. აღნიშნული რეზოლუციების განხორციელების ფარგლებში შეიქმნა საკონსულტაციო საბჭო, რომელსაც თურქეთის პირველი ლედი ემინე ერდოღანი ხელმძღვანელობს. მისივე ინიციატივით, 2023 წელს ჩამოყალიბდა საერთაშორისო პლატფორმა - ნულოვანი ნარჩენების ფონდი, რომელიც ეხმარება ინოვაციური ცოდნის გავრცელებას, გაზიარებას და საერთაშორისო თანამშრომლობის გაღრმავებას ადგილობრივ, ეროვნულ და გლობალურ დონეებზე.
სტამბოლში გამართულ მაღალი დონის პანელურ დისკუსიას სხვადასხვა ქვეყნის უმაღლესი თანამდებობის პირები ესწრებოდნენ, მათ შორის - იტალიის, ესპანეთის, უნგრეთის, არაბთა გაერთიანებული საამიროების და აზერბაიჯანის სოფლის მეურნეობის მინისტრები. მონაწილეებმა განიხილეს სურსათისა და წყლის რესურსების ეფექტიანი მენეჯმენტის თანამედროვე მოდელები, ნარჩენების შემცირების ინიციატივები და მდგრადი განვითარების დღის წესრიგში მათი ინტეგრაციის მნიშვნელობა.
