აშშ-ის პრეზიდენტმა დონალდ ტრამპმა განაცხადა, რომ თუ ვოლოდიმირ ზელენსკი „სამშვიდობო გეგმას“ არ მიიღებს, მას ბრძოლის გაგრძელება მოუწევს.
ტრამპი მიიჩნევს, რომ აშშ-ის ცეცხლის შეწყვეტის გეგმა მშვიდობის მიღწევის გზაა და რომ პრეზიდენტ ზელენსკიმ ის უნდა მიიღოს.
„თუ ზელენსკის ეს შეთანხმება არ მოსწონს, მათ უბრალოდ ბრძოლა უნდა განაგრძონ“, - განუცხადა ტრამპმა ჟურნალისტებს ოვალურ კაბინეტში.
„გარკვეულ მომენტში მას გარკვეული გადაწყვეტილებების მიღება მოუწევს. გახსოვთ, არც ისე დიდი ხნის წინ ოვალურ კაბინეტში ვუთხარი: „თქვენ არ გაქვთ კარტები. არ დაგავიწყდეთ, ეს ომი მე მემკვიდრეობით მივიღე. ეს ომი არასდროს მოხდებოდა. ეს ომი მემკვიდრეობით მივიღე. და ვფიქრობ, რომ მას ეს გარიგება ერთი წლის წინ, ორი წლის წინ უნდა დაედო. საუკეთესო ვარიანტი იქნებოდა, რომ ეს არასდროს დაწყებულიყო. ეს კარგი გარიგება იქნებოდა. ამის გაკეთებაც შეიძლებოდა, სწორი პრეზიდენტი რომ გყოლოდათ, მაგრამ სწორი პრეზიდენტი არ გყავდათ,“ - განაცხადა ტრამპმა.
ტრამპმა აღნიშნა, რომ წინ ზამთარი შესაძლოა „ცივი“ იყოს, რადგან უკრაინის ენერგეტიკული სექტორი უკვე არაერთი მასშტაბური თავდასხმის მსხვერპლი გახდა.
მან კიდევ ერთხელ გაუსვა ხაზი, რომ პრეზიდენტი რომ ყოფილიყო, „ეს ომი არ მოხდებოდა“ და რომ მას „პუტინთან ძალიან კარგი ურთიერთობა აქვს“, თუმცა „ტანგოსთვის ორი ადამიანია საჭირო“.
