დონალდ ტრამპმა ისრაელის პრეზიდენტს წერილი გაუგზავნა და ბენიამინ ნეთანიაჰუს შეწყალება ოფიციალურად სთხოვა, - ინფორმაციას გამოცემა The Times of Israel-ი ისრაელის პრეზიდენტის, იცხაკ ჰერცოგის ადმინისტრაციაზე დაყრდნობით ავრცელებს.
„მიუხედავად იმისა, რომ მე აბსოლუტურად პატივს ვცემ ისრაელის სასამართლო სისტემის დამოუკიდებლობას და მის მოთხოვნებს, მე მჯერა, რომ ეს „საქმე“ ბიბის (ბენიამინ ნეთანიაჰუს) წინააღმდეგ, რომელიც დიდი ხნის განმავლობაში იბრძოდა ჩემთან ერთად, მათ შორის ისრაელის ძალიან მკაცრი მოწინააღმდეგის, ირანის წინააღმდეგ, პოლიტიკური, გაუმართლებელი დევნაა“, – ნათქვამია ტრამპის წერილში, რომელიც ჰერცოგის ოფისმა გაავრცელა.
ბენიამინ ნეთანიაჰუს წინააღმდეგ კორუფციის საქმეზე სასამართლო პროცესი 2020 წლიდან მიმდინარეობს. ნეთანიაჰუს ბრალად ქრთამის აღება, თაღლითობა და ნდობის ბოროტად გამოყენება ედება. ისრაელის პრემიერ-მინისტრი ბრალს არ აღიარებს და თავს უდანაშაულოდ მიიჩნევს.
