„მინდა მადლობა გადაგიხადოთ ჩვენი უწყების საქმიანობის მიმართ გამოჩენილი ინტერესისთვის. ცოდნითა და ენერგიით თქვენ საკუთარი წვლილი შეგაქვთ სამინისტროს ყოველდღიურ საქმიანობაში. სახელმწიფო ინსტიტუტების გაძლიერებისთვის განსაკუთრებით მნიშვნელოვანია ახალგაზრდა თაობის აქტიური ჩართულობა. თქვენ ქმნით ქვეყნის მომავალს. ვიმედოვნებ, არაერთი თქვენგანის სამსახურებრივი კარიერა ჩვენთან დაიწყება და ამ საპასუხისმგებლო გზაზე მინდა წარმატებები გისურვოთ“, - განაცხადა დავით სონღულაშვილმა.
შეხვედრის ფარგლებში, მინისტრმა სტაჟიორების შეკითხვებს უპასუხა.
დავით სონღულაშვილმა ახალგაზრდებს სამინისტროს საქმიანობის ძირითადი მიმართულებები გააცნო. მინისტრმა ისაუბრა მეღვინეობა-მევენახეობის, სატყეო რეფორმის, ნარჩენების მართვის სისტემის გაუმჯობესების და პლასტიკის მოხმარების შემცირების მნიშვნელობის საკითხებზე. მინისტრმა ხაზგასმით აღნიშნა სურსათის უსაფრთხოებისა და ხარისხის სტანდარტების ამაღლების აუცილებლობის საკითხი, რაზეც სამინისტრო და შესაბამისი უწყებები აქტიურად მუშაობენ.
აღსანიშნავია, რომ საქართველოს პრემიერ-მინისტრის გადაწყვეტილებით, საჯარო დაწესებულებებში, ასევე, საჯარო დაწესებულებების სისტემაში შემავალ უწყებებში ანაზღაურებადი სტაჟირების პროგრამა ხორციელდება.
გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ზურაბ ეზუგბაია ესწრებოდა.
