მათ უკან, რომლებიც აცხადებენ, რომ საბოტაჟში ვიღებდი მონაწილეობას, დგანან ის ადამიანები, რომლებმაც 1992 წლის 6 იანვარს ძალადობრივად დაამხეს ჩვენი ხელისუფლება, - ამის შესახებ "ლელო - ძლიერი საქართველოს" ერთ-ერთმა ლიდერმა ბადრი ჯაფარიძემ სასამართლო პროცესზე განაცხადა.
ჯაფარიძის თქმით, მის მიმართ წარდგენილ ბრალს წაიკითხა არ ეთანხმება.
"წავიკითხე ბრალი. გადმოცემულ მასალებს ვეცნობოდით. ეს არის სრული სიცრუე. არანაირი ძალადობრივ ჯგუფთან არ მქონია კავშირი. მე, რომელიც ხელის მომწერი ვარ "დამოუკიდებლობის აქტის", მე მდებენ ბრალს? ადამიანები, რომლებიც აცხადებენ, რომ საბოტაჟში ვიღებდი მონაწილეობას, სამწუხაროდ, ამის უკან დგანან ის ადამიანები, რომლებმაც ძალადობრივად დაამხეს ჩვენი ხელისუფლება 1992 წლის 6 იანვარს. ეს არის მათ მიერ ინსპირირებული პოლიტიკური ანგარიშსწორება იმ ადამიანის მიმართ, ვინც “დამოუკიდებლობის აქტის” ხელმომწერია. ეს პროცესი არის ინსპირირებული იგივე ჯგუფის მიერ, რომელიც მონაწილეობდა დემოკრატიულად არჩეული ხელისუფლების დამხობაში.
არ არსებობს იმის მტკიცებულებაც კი, რომ ძალადობრივ ჯგუფთან მქონდა კავშირი. არ ვეთანხმები იმას, რაც იყო წაკითხული," - "ტვ პირველის" ცნობით, განაცხადა ბადრი ჯაფარიძემ.
8 ოპოზიციური ლიდერის პროცესი თბილისის საქალაქო სასამართლოში ამ წუთებში მიმდინარეობს. საქმეს მოსამართლე ფიქრია სიქტურიშვილი განიხილავს.
ცნობისთვის, გენერალურმა პროკურატურამ მიხეილ სააკაშვილის, გიორგი ვაშაძის, ნიკა გვარამიას, ნიკა მელიას, ზურაბ ჯაფარიძის, ელენე ხოშტარიას, მამუკა ხაზარაძისა და ბადრი ჯაფარიძის წინააღმდეგ ახალი სისხლის სამართლებრივი დევნა დაიწყო. პროკურატურის ინფორმაციით, საქმე ეხება სახელმწიფოს წინააღმდეგ ჩადენილ დანაშაულებს, კერძოდ: საბოტაჟს, უცხო ქვეყნისათვის მტრულ საქმიანობაში დახმარებას, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობის დაფინანსებას და საქართველოს კონსტიტუციური წყობილების ძალადობით შეცვლისკენ ან სახელმწიფოს ხელისუფლების დამხობისკენ მოწოდებას.
