9 ოქტომბერს ევროპარლამენტმა დაამტკიცა რეზოლუცია, რომელიც ევროკავშირის წევრ სახელმწიფოებს მოუწოდებს, ჩამოაგდონ საჰაერო სამიზნეები, რომლებიც უკანონოდ დაარღვევენ მათ საზღვრებს.
ევროპარლამენტარები მიიჩნევენ, რომ რუსული თვითმფრინავებისა და დრონების ჩამოგდება შესაძლებელია, თუ ისინი ევროკავშირის ქვეყნების საჰაერო სივრცეში შეიჭრებიან.
რეზოლუციას მხარი 469 ევროპარლამენტარმა დაუჭირა, 97 წინააღმდეგი იყო, ხოლო 38-მა თავი შეიკავა.
„ევროპარლამენტი... მხარს უჭერს ნებისმიერ ინიციატივას, რომელიც საშუალებას აძლევს ევროკავშირს და მის წევრ სახელმწიფოებს, განახორციელონ კოორდინირებული, ერთიანი და პროპორციული ქმედებები მათი საჰაერო სივრცის ყველა დარღვევის საპასუხოდ, მათ შორის საჰაერო საფრთხეების ჩამოგდებისას“, - ნათქვამია დოკუმენტში.
ევროპარლამენტარები მიესალმებიან ევროკავშირის „დრონების კედლის“ კონცეფციას და „აღმოსავლეთ ფლანგის გვარდიის“ ინიციატივას (Eastern Flank Watch).
ევროპარლამენტი აღნიშნავს, რომ რუსეთის მიერ ევროკავშირის წინააღმდეგ განხორციელებული დივერსიული და ჰიბრიდული ქმედებები შეიძლება შეფასდეს, როგორც „ტერორიზმის სახელმწიფო სპონსორობა“, მაშინაც კი, თუ ეს ქმედებები შეიარაღებული თავდასხმის ზღურბლს არ მიაღწევს.
ევროპარლამენტარები ასევე მოუწოდებენ ევროკავშირის საბჭოსა და ევროკომისიას, „გააძლიერონ რუსეთის წინააღმდეგ სანქციების ეფექტურობა და გავლენა“ და გაავრცელონ სანქციები სხვა სახელმწიფოებზე, რომლებიც ხელს უწყობენ რუსეთის ქმედებებს, კერძოდ, ბელარუსზე, ირანსა და ჩრდილოეთ კორეაზე.
გარდა ამისა, ევროპარლამენტი მოითხოვს სანქციების დაწესებას ჩინური კომპანიებისთვის, რომლებიც რუსეთს აწვდიან ორმაგი დანიშნულების საქონელს და სამხედრო პროდუქციას, რომელიც საჭიროა დრონებისა და რაკეტების წარმოებისთვის.
