ევროკავშირი ბელგიაზე ზეწოლას აძლიერებს, რათა გაყინული რუსული აქტივები უკრაინისთვის რეპარაციის სესხის სახით გამოიყენოს, - ამის შესახებ Financial Times დიპლომატიურ წყაროებზე დაყრდნობით იუწყება.
გამოცემის ცნობით, 190 მილიარდი ევროს ღირებულების რუსეთის სუვერენული აქტივები, რომლებიც ბრიუსელში ინახება, 2022 წელს რუსეთის მიერ უკრაინის წინააღმდეგ წამოწყებული ომის საპასუხოდ გაყინეს.
გეგმა არ ითვალისწინებს აქტივების პირდაპირ ექსპროპრიაციას; ამის ნაცვლად, ევროკავშირი უკრაინას ამ ფონდებით უზრუნველყოფილ 140 მილიარდი ევროს ოდენობის სესხს გამოუყოფს. როგორც გერმანიის კანცლერმა ფრიდრიხ მერცმა განმარტა, ეს თანხა უკრაინის შეიარაღებას მოხმარდება.
გეგმის თანახმად, უკრაინას სესხის დაფარვა ომის დასრულების შემდეგ მოუწევს და რუსეთი დათანხმდება მიყენებული ზარალის ანაზღაურებას. ამის შემდეგ, ევროკომისია თანხას Euroclear-ს დაუბრუნებს და რუსეთი მის გამოყენებას კვლავ შეძლებს.
ბელგიის პრემიერ-მინისტრმა, ბარტ დე ვევერმა სთხოვა ევროკავშირის დანარჩენ წევრებს, ამ ნაბიჯის გადასადგმელად აანაზღაურონ იურიდიული და ფინანსური რისკები, რომ ბელგიას არ მოუწიოს ამ თანხის გადახდა.
ბელგიის ამ პოზიციას ევროპის დედაქალაქებიდან კრიტიკა მოჰყვა, განსაკუთრებით იმის გათვალისწინებით, რომ ბრიუსელში არსებულ რუსულ აქტივებს ერიცხება ბელგიური კორპორატიული გადასახადი.
2022 წლიდან ბელგიის მთავრობამ რუსული აქტივებიდან მიღებულ მოგებაზე გადასახადების სახით 3.6 მილიარდი ევრო მოაგროვა.
როგორც FT აღნიშნავს, მიუხედავად ბელგიის მტკიცებისა, რომ ეს საგადასახადო შემოსავლები მთლიანად უკრაინის მხარდასაჭერად იყო განკუთვნილი, კიევში მთელი თანხა არ გადარიცხულა.
როგორც მედია წერს, ბელგიის პრემიერ-მინისტრის პოზიციის გამო, ევროპელი ლიდერების ნაწილი ახლახან კოპენჰაგენში გამართულ სამიტზე გაღიზიანებას არ მალავდა. ისინი ასევე ამახვილებდნენ ყურადღებას იმ ფაქტზეც, რომ ბოლო სამ წელიწადში ბელგია გაცილებით ნაკლებად ეხმარებოდა უკრაინას, ვიდრე დანია, შვედეთი და გერმანია. თავის მხრივ, ბელგიაში აცხადებენ, რომ პრემიერ-მინისტრის პოზიცია გამართლებულია, რადგანაც ის ეროვნულ ინტერესებს იცავს.
