რისთვის დაიბარეს ელჩები სინამდვილეში? ივანიშვილის რეჟიმს აქვს ცრუ ილუზიები, რომ 4 ოქტომბერს რაღაც მორალური უპირატესობა მოიპოვა და ვინმეს დაარწმუნებს, რომ მას არა ქართველი ხალხი, არამედ 'რადიკალური' დაჯგუფება ებრძვის, - ამის შესახებ „ძლიერი საქართველო - ლელოს“ წევრი სალომე სამადაშვილი სოციალურ ქსელში წერს.
როგორც სამადაშვილი აღნიშნავს, არ უნდა გამოუცხადო ომი საკუთარ ხალხს და გქონდეს რაიმე ილუზია, რომ ვინმე შენს მხარეს დადგება თავისუფალ სამყაროში,
“რისთვის დაიბარეს ელჩები გუშინ სინამდვილეში? რატომ დაიმართა მორიგი ისტერიკა პაპუაშვილმა დასავლეთის 'ტერორიზმში' დადანაშაულების მცდელობით?ივანიშვილის რეჟიმს აქვს ცრუ ილუზიები, რომ 4 ოქტომბერს რაღაც მორალური უპირატესობა მოიპოვა და ვინმეს დაარწმუნებს, რომ მას არა ქართველი ხალხი, არამედ 'რადიკალური' დაჯგუფება ებრძვის. ვინმეს რამეს ათქმევინებს, რასაც 'ნაძეჟდა' და სხვები შეასაღებენ ხალხს, როგორც რეჟიმის მხარდაჭერას.
არავინ და არასდროს, დემოკრატიულ სამყაროში, ამას არ გააკეთებს. მარტივი მიზეზით-ძალაუფლება საქართველოში დღეს მიტაცებულია გაყალბებული არჩევნებით. ქვეყანას მართავს პოლიტიკური ძალა, რომელმაც დაარღვია კონსტიტუცია, როდესაც უარი თქვა ევროპაზე.
სანამ ეს არ შეიცვლება, არ ჩატარდება ახალი, დემოკრატიული არჩევნები, არანაირი ნორმალიზაცია დასავლეთთან ურთიერთობების არ იქნება. დიახ, დასავლეთი მშვიდობის მხარეს და ძალადობის წინააღმდეგაა. ამიტომ არ უნდა გამოუცხადო ომი საკუთარ ხალხს და გქონდეს რაიმე ილუზია, რომ ვინმე შენს მხარეს დადგება თავისუფალ სამყაროში, სადაც ხელისუფლების წყაროდ ითვლება ხალხი. ხალხი, რომლის დამორჩილებასაც, ძალით, მხოლოდ ტირანიაში ცდილობენ“, - წერს სამადაშვილი.
ცნობისათვის, გუშინ, საგარეო უწყებაში, საქართველოში აკრედიტებული დიპლომატიური კორპუსის წარმომადგენლებთან შეხვედრა გაიმართა.
„შეკრება ემსახურებოდა იმ მიზანს, რომ დიპლომატიური კორპუსისთვის მიგვეწოდებინა სრული ინფორმაცია არჩევნებთან დაკავშირებით, რომელიც ჩატარდა 4 ოქტომბერს, ასევე ამ დღეს განვითარებულ მოვლენებთან დაკავშირებით თბილისში. მათ მიეწოდათ ის ინფორმაცია, რომელიც ჩვენმა საზოგადოებამ იხილა პირდაპირ ეთერში. ამასთანავე, იმ გამოძიებებზე, რომელიც მიმდინარეობს 4 ოქტომბერს განვითარებულ მოვლენებთან დაკავშირებით“, - განაცხადა საგარეო საქმეთა მინისტრმა მაკა ბოჭორიშვილმა.
