რუსეთის მიერ ოკუპირებული აფხაზეთის ტერიტორიაზე მონური შრომის მსხვერპლი თურქი 39 წლის ჰუსეინ აიდანი აღმოჩნდა. იგი საქართველოში სამსუნიდან ჩამოვიდა და სოჭში გადასვლა მოახერხა, სადაც ეროვნებით აფხაზთან ვინმე თემურთან გენზე უნდა ემუშავა.
მიცემული პირობა არ შესრულებულა. მეპატრონემ ის ოჩამჩირეში ჩაიყვანა, პასპორტი და სხვა საბუთები წაართვა და 30 თურქთან ერთად მონურ პირობებში ამუშავებდა. მას შემდეგ, რაც დაუმორჩილებლობისათვის მის სიცოცხლეს საფრთხე შეექმნა, ჰუსეინ აიდანმა გაქცევა გადაწყვიტა. მან ზუგდიდში გადმოსვლა მოახერხა. იგი უკვე დააკავშირეს ოჯახსა და თურქეთის კონსულს საქართველოში.
მიუხედავავ იმისა, რომ აიდანმა საქართველოს საზღვარი უკანონოდ გადმოლახა, იმის გამო, რომ იგი ტრეფიკინგის მსხვერპლად იქცა, მის წინააღმდეგ ქართველი სამართალდამცავები სისხლის სამართლის საქმეს არ აღძრავენ.
"თურქეთის მოქალაქე ვარ. აფხაზეთის ტერიტორიაზე რუსეთის ვიზით შევედი. წინასწარი შეთანხმებით თევზჭერის გემზე უნდა მემუშავა და თვეში 1 100 აშშ დოლარი უნდა ამეღო. იქ გამაცნეს აფხაზი ეროვნების ვინმე თემური, რომელმაც გემზე მიმიყვანა, თუმცა იმ გემით ღია ზღვაში გასვლა შეუძლებელი იყო. ამიტომ შეთანხმებაზე უარი ვთქვი. ამის შემდეგ მან ფიზიკური შეურაცხყოფა მომაყენა, იარაღის მუქარით პასპორტი და 100 აშშ დოლარი წამართვა. რამდენიმე დღეს გემზე შავი სამუშაოს კეთებას მაიძულებდა", _ აცხადებს აიდანი.
