2024 წლის "ინოვაციური პროექტისათვის” ეროვნული მედიაჯილდო "ოქროს პერგამენტით" ცნობილი ფინანსიტი და ციფრული ბუღალტერიის Fass App პროექტის ავტორი ნათია სხვიტარიძე დაჯილდოვდა. მას ეს ჯილდო სწორედ Fass App-ის შექმნისთვის გადაეცა.

ნათია სხვიტარიძე საქართველოს ფინანსურ წრეებში ცნობილია როგორც ინოვაციური ფინანსური გადაწყვეტილებების შემქმნელი და ბიზნესის კონსულტანტი. ის არის ორი წიგნის ავტორი. მისი პირველი წიგნი "ფინანსური ანალიზის როლი საანალიზო საწარმოთა სტრატეგიულ განვითარებაში", რომელიც 2022 წელს გამოიცა, ხოლო მეორე - "ფინანსური ანალიზი მეწარმეებისთვის: გადაწყვეტილებები რიცხვებზე დაყრდნობით", 2024 წელს. მას მიღებული აქვს არაერთი ჯილდო, ის არის არაერთი ადგილობრივი და საერთაშორისო ასოციაციის წევრი. მონაწილეობს მსოფლიოს სხვადასხვა ქვეყნებში მიმდინარე ფორუმებსა და სადისკუსიო პანელებში.

აღსანიშნავია, რომ 2024 წელს ეროვნული მედიაჯილდოს „ოქროს პერგამენტის“ ფარგლებში ჯილდო 11 ნომინაციაში გაიცა. გამარჯვებულები საქართველოს მასშტაბით ჩატარებული გამოკითხვის საფუძველზე გამოვლინდნენ. სულ საქართველოს მასშტაბით გამოიკითხა 2157 რესპონდენტი.

2024 წლის "ოქროს პერგამენტის" ლაურეატები დასახელდნენ შემდეგ ნომინაციებში: წლის პოლიტიკოსი, უფლებადამცველი, ბიზნესმენი, ქველმოქმედი, ჟურნალისტი, სპორტული მენეჯერი, წლის პროექტი, კომპანია, ბრენდი, წლის ინოვაციური პროექტი და "ოქროს პერგამენტის" საპატიო ლაურეატი.

2024 წლის ადამიანებისა და კომპანიების - "ოქროს პერგამენტის" ლაურეატობის კანდიდატების სარეიტინგო შერჩევაში მონაწილეობა 100-მა ექსპერტ-სპეციალისტმა მიიღო. სარეიტინგო შერჩევის საფუძველზე შედგა ნომინატების სია და გამოკითხვის ანკეტა.

"ოქროს პერგამენტი" - არის პრესტიჟული ეროვნული მედია ჯილდო, რომელიც გადაეცემა წლის ადამიანს, წლის პროექტს, წლის კომპანიას 11 სხვადასხვა ნომინაციაში.

"ოქროს პერგამენტის" ლაურიატის წოდება ენიჭება და სახელობითი ჯილდო გადაეცემა წლის ადამიანს, პროექტს, კომპანიას, რომელიც სრულად პასუხობს კონკურსის მოთხოვნებს, ექსპერტების და ჯილდოს ორგანიზატორების მიერ დაწესებული შეფასების მაღალ კრიტერიუმებს და საერთაშორისო სტანდარტებს, აქვს ეროვნული აღიარება, არის კრეატიული, შემოაქვს განსაკუთრებული სიახლე, აქვს მაღალი საზოგადოებრივი ნდობა და მაღალი რეპუტაცია, ხელს უწყობს განვითარებას და პროგრესს, ხელს უწყობს საქართველოს პოპულარიზაციას მთელ მსოფლიოში.

ღონისძიების საინფორმაციო მხარდამჭერები: რადიო "ფორტუნა", გაზეთი "ვერსია", GHN, "მთავარი.ინფო", "პრაიმნიუსჯორჯია".

ავტორი: გიორგი დამენია