უკრაინელებმა რუსეთის სამხედრო ძალის მნიშვნელოვნად შემცირება უკვე მოახერხეს, - ამის შესახებ აშშ-ის სპეციალურმა წარმომადგენელმა, კიტ კელოგმა განაცხადა. მისივე თქმით, რუსეთი უკრაინის წინააღმდეგ ომში გამარჯვებას ვეღარ მიაღწევს.
აშშ-ის სპეციალური წარმომადგენლის განცხადებით, უკრაინელები უპილოტო აპარატების წარმოებაში მსოფლიო ლიდერები გახდნენ და მნიშვნელოვნად გაუსწრეს შეერთებულ შტატებს. ამის მიუხედავად, კელოგი დარწმუნებულია, რომ აშშ-ის პრეზიდენტის, დონალდ ტრამპის დიპლომატიურ სტრატეგიას შეუძლია ომის დასრულება.
„მიუხედავად იმისა, რომ რუსეთს ჰყავს ძლიერი არმია, ის ისეთი ძლიერი არ არის, როგორც თავად რუსები გვარწმუნებენ. უკრაინელებმა უკვე მოახერხეს რუსეთის ფედერაციის სამხედრო ძალის მნიშვნელოვნად შემცირება და, შესაბამისად, უკრაინის დამარცხებაზე საუბარი აღარ არის. პრეზიდენტ ტრამპს ერთი-ერთზე დიპლომატიის სჯერა. მაშინაც კი, თუ ადამიანებს ერთმანეთი სძულთ, მათთან უნდა ისაუბროთ და ერთმანეთის გაგების გზა იპოვოთ. შეიძლება, ეს არ მოგეწონოთ, მაგრამ მცდელობაზე უარი არ უნდა თქვათ“, – განაცხადა კიტ კელოგმა.
