გარემოს დაცვისა და სოფლის მეურნეობის მინისტრი დავით სონღულაშვილი წილკანში, სოფლის მეურნეობის სამეცნიერო-კვლევითი ცენტრის ლაბორატორიულ ბაზაზე იმყოფებოდა. მინისტრი ლაბორატორიების ხელმძღვანელებსა და თანამშრომლებს შეხვდა და მიმდინარე საქმიანობას ადგილზე გაეცნო.
სოფლის მეურნეობის სამეცნიერო-კვლევითი ცენტრის დირექტორმა ლევან უჯმაჯურიძემ მინისტრს ბაზის სამეცნიერო ინფრასტრუქტურა და მიმდინარე კვლევითი პროგრამები წარუდგინა.
დავით სონღულაშვილმა აგრარული დარგის განვითარებაში სამეცნიერო კვლევების, თანამედროვე ცოდნაზე წვდომის და მაღალი სტანდარტების შესაბამისი ლაბორატორიების მნიშვნელობაზე გაამახვილა ყურადღება.
„ჩვენი მიზანია, კიდევ უფრო გავზარდოთ თანამედროვე ცოდნასა და პრაქტიკაზე წვდომის შესაძლებლობები. ეს არის საფუძველი, რომ სოფლის მეურნეობაში ინოვაციაზე დაფუძნებული განვითარება რეალურად განხორციელდეს“,-განაცხადა დავით სონღულაშვილმა.
წილკნის ბაზა ერთ-ერთი მთავარი ცენტრია, სადაც ერთიანდება ნიადაგის, თესლისა და სარგავი მასალის, ქსოვილის კულტურისა და დნმ-ის ლაბორატორიები; აქვე მოქმედებს სერტიფიცირების პროცედურებისათვის საჭირო სათესლე მასალის შესანახი საცავი და მეაბრეშუმეობის ბაზა, სადაც მიმდინარეობს თუთის აბრეშუმხვევიას ქართული და ინტროდუცირებული ჯიშების შენარჩუნება, გაუმჯობესება, ახალი ჯიშების გამოყვანა და, მოთხოვნის შემთხვევაში, ფერმერული მეურნეობებისთვის წარმოება.
ბაზაზე განსაკუთრებული ყურადღება ეთმობა ერთწლოვანი კულტურების საცდელ-სადემონსტრაციო ნაკვეთებს. ნაკვეთებზე მარცვლოვანი კულტურების, პარკოსნების, ბოსტნეული, ბაღჩეული და ორგანული წარმოების კულტურების კვლევა მიმდინარეობს.
ბაზის ტერიტორიაზე, ისრაელის საელჩოს დაფინანსებითა და MASHAV-ის პროგრამის ფარგლებში, მოწყობილია თანამედროვე ტექნოლოგიებით აღჭურვილი სადემონსტრაციო ჰაბი, ეკრანული სათბური, სადაც ფერმერებისა და სტუდენტებისთვის რეგულარულად ტარდება ტრენინგები და გადამზადების კურსები.
