აშშ-ის პრეზიდენტმა დონალდ ტრამპმა განაცხადა, რომ ვლადიმირ პუტინთან მოლაპარაკებების დროს მხარეებმა განიხილეს ტერიტორიული ცვლილებებისა და უკრაინის უსაფრთხოების გარანტიების საკითხები და უკვე მიაღწიეს მნიშვნელოვან პროგრესს.
ასე უპასუხა მან Fox News-ის ჟურნალისტის, შონ ჰენიტის შეკითხვას, რომელმაც აღნიშნა, რომ გარედან სიტუაცია შემდეგნაირად აღიქმება: შედეგად, შესაძლებელია ტერიტორიული გაცვლა, რუსეთი მიიღებს იმაზე მეტს, ვიდრე ადრე ჰქონდა და უკრაინას სჭირდება უსაფრთხოების გარანტიები, რომლებიც ნატო-სთან არ არის დაკავშირებული.
„ვფიქრობ, ეს ის საკითხებია, რომლებიც განვიხილეთ და რომლებზეც ძირითდად უკვე შევთანხმდით. სინამდვილეში, ბევრ რამეზე შევთანხმდით და შემიძლია ვთქვა, რომ შეხვედრა ძალიან თბილი იყო. იცით, ის ძლიერი ადამიანია, უკიდურესად მკაცრი და ა.შ., მაგრამ თავად შეხვედრა ორ ძალიან მნიშვნელოვან ქვეყანას შორის ძალიან თბილი იყო და კარგია, როდესაც ერთმანეთს კარგად ეწყობიან. ვფიქრობ, შეთანხმებასთან საკმაოდ ახლოს ვართ“, - განაცხადა ტრამპმა.
ამავდროულად, მან ხაზგასმით აღნიშნა, რომ საბოლოო გადაწყვეტილება უკრაინაზე იქნება დამოკიდებული. „რა თქმა უნდა, უკრაინა ამას უნდა დათანხმდეს. შესაძლოა, მათ უარი თქვან, დიდ საომარ მანქანას ებრძვიან. ბაიდენმა ფული კანფეტივით დაარიგა და ევროპამ ბევრი ფული გასცა. ჩვენ სამას ორმოცდაათი მილიარდი დოლარი გავეცით, ევროპამ მნიშვნელოვნად ნაკლები, მაგრამ მაინც ბევრი - ასი მილიარდი დოლარი. ვფიქრობ, ჩვენ ახლოს ვართ შეთანხმებასთან, ამის თქმა არ მომწონს. როდესაც ნამდვილად ახლოს ვარ, მე ყოველთვის ვამბობ, 50/50-ზე, რადგან ბევრი რამ შესაძლოა, მოხდეს. თუმცა, ვფიქრობ, პრეზიდენტ პუტინს სურს პრობლემის გადაჭრა“, - დასძინა მან.
ცნობისათვის, აშშ-ის პრეზიდენტმა მანამდე განაცხადა, რომ აშშ-ს, ევროპასთან და სხვა ქვეყნებთან ერთად, შეუძლია უკრაინისთვის უსაფრთხოების გარანტიები მიცემა, მაგრამ არა ნატო-ს ფორმატში. ამავდროულად, მან დასძინა, რომ ალასკაში შეხვედრის დროს ტერიტორიების გაცვლის საკითხზე იმსჯელებენ, თუმცა ტრამპმა „უკრაინას გადაწყვეტილების მიღების შესაძლებლობა უნდა მისცეს“.
