"კოალიცია ცვლილებებისთვის" წევრი, თენგიზ თევზაძე მიიჩნევს, რომ მთავარი არა საარჩევნო ნომერი, არამედ “ქართული ოცნების და მისი ბანდის დამარცხებაა“.
მისივე თქმით, შემდეგი არჩევნები იქნება აუცილებლად სამართლიანი და აუცილებლად გაუქმედება ამ ე.წ. არჩევნების შედეგები.
"ქართულმა ოცნებამ, რუსულმა რეჟიმმა და მისმა ბანდამ, რომელსაც საარჩევნო ადმინისტრაცია ჰქვია, გადაწყვიტა, კვალიფიციურ პოლიტიკურ პარტიებს წაართვას საარჩევნო ნომერი. ნომერი არ აძლევს პოლიტიკურ პარტიას ლეგიტიმაციას, ლეგიტიმაციას მას აძლევს ხალხი და ის სამართლიანი არჩევნები, რომლებიც აუცილებლად ჩატარდება ამ ქვეყანაში.
დღეს ჩვენ ე.წ. არჩევნებში ვხედავთ ქართულ ოცნებას და 16 სისტემური ოპოზიციის ნაწილს, რომლებმაც გადაწყვიტეს ბიულეტენში შეიტანონ ნომერი 4 და რომელიღაც ოპოზიციურად წოდებულ პარტიას მიაღებინონ ამ ნომრით მონაწილეობა.
ჩვენთვის ნომერი არ არის მთავარი. ჩვენთვის მთავარია, ქართული ოცნების და იმ კრიმინალური ბანდის დამარცხება, რომელიც საქართველოს საუკუნოვან ისტორიულ ფუნქციას აკარგვინებს. შემდეგი არჩევნები იქნება აუცილებლად სამართლიანი და აუცილებლად გაუქმედება ამ ე.წ. არჩევნების შედეგები.,- განაცხადა მან.
„ნაციონალურმა მოძრაობამ“ და „კოალიცია ცვლილებისთვის“ ცესკო-სთვის თვითმმართველობის არჩევნებში მონაწილეობის თაობაზე არ მიმართვის გამო, საარჩევნო ნომრები დაკარგეს.
ცესკოს თავმჯდომარის გიორგი კალანდარიშვილის თქმით, საერთო ჯამში თვითმმართველობის არჩევნებში მონაწილეობის მისაღებად 17-მა პარტიამ შეიტანა განაცხადი, ხოლო 5 საარჩევნო სუბიექტს, რომლებმაც 2024 წლის საპარლამენტო არჩევნებში მიიღეს მონაწილეობა, ის ნომრები მიენიჭათ, რომელიც საპარლამენტო არჩევნების დროს ჰქონდათ.
