ნაცვლად იმისა, შვედეთის საელჩომ განგვიმარტოს, ერთნაირსქესიანთა ქორწინებასთან დაკავშირებით შვედეთის პრემიერის პოზიცია ვრცელდება თუ არა საქართველოზეც, ექსტრემისტი „ენჯეოების“ დაფინანსებით არის დაკავებული და ქართველი ხალხის კითხვას ემალება, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
პაპუაშვილი გამოეხმაურა შვედეთის პრემიერ-მინისტრის, ულფ კრისტენსონის განცხადებას, სადაც მან აღნიშნა: უკრაინაში ერთნაირსქესიან წყვილებს არ შეუძლიათ ქორწინება, LGBTQI თემის სრული სამართლებრივი დაცვა მნიშვნელოვანია უკრაინის ევროკავშირთან დაახლოებისთვის, შვედეთი ყურადღებით დააკვირდება, რომ ეს ვალდებულება შესრულდეს“.
„ჩვენ ვხედავთ, რომ შვედეთის ელჩი და საელჩო არ ასრულებენ თავიანთ ფუნქციას. ელჩის ფუნქციაა, განმარტოს და წარმოადგინოს საკუთარი ხელისუფლების პოზიცია. ვნახეთ შვედეთის პრემიერ-მინისტრის პოზიცია, მკაფიოდ თქვა, რომ ევროკავშირში გაწევრიანების გზაზე უკრაინის პროგრესისთვის მნიშვნელოვანია, უკრაინამ დააკანონოს ლგბტ ქორწინება. ეს თქვა პირდაპირ, მკაფიოდ და არაორაზროვნად. მარტივი კითხვა არსებობს შვედეთის საელჩოს მიმართ, განმარტოს მისი მთავრობის პოზიცია, პრემიერ-მინისტრს წამოცდა, თუ ეს არის შვედეთის მთავრობის ოფიციალური პოზიცია კანდიდატი ქვეყნების პროგრესზე გადაწყვეტილების მიღების დროს; ასევე საქართველოზეც შესაბამისად ვრცელდება თუ არა ეს პოზიცია. შვედეთის ელჩმა უნდა განმარტოს, ეს არის ზუსტად ელჩის საქმიანობა. ნაცვლად ამისა, შვედეთის საელჩო დაკავებულია ძალადობაში ბრალდებული ადამიანების პროცესებზე ფოტოების გადაღებით, თავმოწონებით, ექსტრემისტი „ენჯეოების“ დაფინანსებით. სინამდვილეში, ეს არის ძირის გამოთხრა დიპლომატიური მისიებისა და წარმომადგენლობის იდეისთვის. ნაცვლად იმისა, განგვიმარტოს შვედეთის პოზიცია, საელჩო იმალება, ემალება ქართველი ხალხის კითხვას, სამაგიეროდ, დღისით, მზისით ექსტრემისტების მხარდაჭერას არ ერიდება“, – განაცხადა შალვა პაპუაშვილმა.
