ეს არ არის კრიტიკა, ეს არის ცილისწამება. შენ ვერ გპატიობენ ღირსებას, ვერ გპატიობენ დამოუკიდებლობას. ვერ გპატიობენ იმას, რომ საქართველოში დღეს არის ისეთი დემოკრატია, რომელიც არც დაესიზმრება ევროკავშირის ქვეყნებს, - განაცხადა კინორეჟისორმა გოგა ხაინდრავამ გადაცემაში „იმედი LIVE“.
„რატომ ვისწრაფოდით იქით? იმიტომ, რომ გვეჩვენებოდა, რომ იქ იყო კანონი, იქ იყო სამართალი, იქ იყო წინსვლა, იქ იყო ეკონომიკური განვითარება და შეხედეთ, ყველაზე ძლიერი ქვეყანა, რომელსაც ეფუძნებოდა ევროკავშირი - გერმანია რეცესიაშია. ეკონომიკური კატასტროფაა იქ. ბრიტანეთში სკანდალია წარმოუდგენელი. 5 მილიარდი ფუნტი სტერლინგი არის დაკარგული. კრახია სრული და ჩვენ ამას ვხედავთ და უნდა დავანებოთ თავი ამ ილუზიებს. მინდა მთავრობას მივმართო, დავამთავროთ ეს ლაპარაკი, რომ ჩვენ ევროკავშირში შევალთ. 2030 წელს ან იარსებებს ევროკავშირი ან არა. ჩვენ, ჩვენი გზა გვაქვს. ჩვენ კავკასიელები ვართ, ჩვენგან წამოვიდა ცივილიზაცია“, - განაცხადა გოგა ხაინდრავამ.
მისი თქმით, როდესაც ღირებულებებზე არის საუბარი ყველაზე ნათელი მაგალითია 17 მაისი - რა ხდება საქართველოში და რა ხდება ბრიუსელის შემოგარენში. გოგა ხაინდრავას განცხადებით, ოჯახის სიწმინდის დღეს აღნიშნავს მთელი საქართველო და სწორედ ოჯახია საფუძველი სახელმწიფოსი და ამაზეა დაფუძნებული ქვეყანაც და საზოგადოებაც.
„ჩვენ ვდგავართ სწორ გზაზე. ვიცავთ ჩვენს ქვეყანას, ჩვენს წარსულ, აწმყოს და მომავალს და ვიცავთ მტკიცედ და ამას ვერ გვპატიობენ. და ვინ ვერ გვპატიობენ პირველ რიგში? აი, ეს ვერ შემდგარი სახელმწიფოები. ვერც საბჭოთა კავშირის დროს იყვნენ შემდგარები ბალტიისპირეთის ქვეყნები და ვერც დღეს“, - განაცხადა გოგა ხაინდრავამ.
