ქვეყანაში როდესაც სისტემის მთავარი პრობლემაა, რომ ის არალეგიტიმურია ქვეყნის შიგნით და გარეთ, ე.წ არჩევნებში მონაწილეობა მაშველი რგოლია, ვინც მონაწილეობას იღებს, კაპიტულანტი იქნება, – ამის შესახებ „ერთიანობა – ნაციონალური მოძრაობის“ გენერალური მდივნის მოადგილემ, ირაკლი ფავლენიშვილმა განაცხადა.
მისივე თქმით, იმ ფონზე, როდესაც სისტემა რეპრესიული ხდება და არასამთავრობო ორგანიზაციებს არჩევნებზე დაკვირვების შესაძლებლობაც წაართვეს, საარჩევნო პროცესის მიმართ ნდობის გაზრდა არაადეკვატურია.
„ქვეყანაში როდესაც დიქტატორული არჩევნები არსებობს, კონსტიტუციური პრინციპები ფეხქვეშ გათელილია და სისტემის მთავარი პრობლემა ისაა, რომ ის ლეგიტიმური არაა ქვეყნის შიგნით და გარეთ, მისთვის ე.წ არჩევნებში მონაწილეობის მიღება არის მაშველი რგოლი. ამიტომაც, ვინც მონაწილეობას იღებს, ის იქნება კაპიტულანტი.
ნებისმიერ საარჩევნო პროცესზე როდესაც ვსაუბრობთ, სადაც სანდოობა არ არსებობს იმ სისტემის მიმართ, რომელიც უფრო და უფრო რეპრესიული ხდება, არჩევნებზე დაკვირვების უფლებაც წაართვეს. მათ შორის, არასამთავრობო ორგანიზაციების მიმართ ისეთი ზომები მიიღეს, რომ, ფაქტობრივად, არჩევნებზე დაკვირვება არ შეეძლებათ. ყველა ამ საკითხის გათვალისწინებით, იმის მოლოდინი, რომ საარჩევნო პროცესის მიმართ უნდა გაზარდო ნდობა, რა თქმა უნდა, არაადეკვატურია. მით უმეტეს, ამაზე საუბრობ, როცა კარგად იცი პოლიტიკური პატიმრების ოჯახების პოზიცია, რუსთაველზე შეკრებილი ხალხის პოზიცია და იმ ორი დიდი პარტიის პოზიცია, რომლებმაც ივანიშვილის გაყალბებული არჩევნებით მიიღო ყველაზე მეტი ხმა. მგონია, ეს ყველაფერი ამ შემთხვევაში არაგულწრფელია, როდესაც ბატონი ხაზარაძე ამას ამბობს“, – განაცხადა ფავლენიშვილმა.
