5 ივნისს მსოფლიო მასშტაბით გარემოს დაცვის მსოფლიო დღე აღინიშნება. ეს დღე გაეროს გენერალური ასამბლეის ინიციატივით 1972 წელს დაწესდა და მნიშვნელოვან როლს ასრულებს საზოგადოების მხრიდან ეკოლოგიური გამოწვევების გაცნობიერებასა და ერთობლივ მოქმედებაში.
წლევანდელი წლის მთავარი თემა – „დაამარცხე პლასტმასით დაბინძურება“ – მიზნად ისახავს პლასტმასის მავნე ზეგავლენის შემცირებას და მდგრადი გარემოს შენარჩუნების საკითხებზე მოსახლეობის ცნობიერების ამაღლებას.
გარემოს დაცვის მსოფლიო დღის აღსანიშნავად, გარემოს დაცვისა და სოფლის მეურნეობის სამინისტროს ინიციატივითა და გარემოსდაცვითი ინფორმაციისა და განათლების ცენტრის ორგანიზებით, სამინისტროს ეზოში ღონისძიება გაიმართა, რომელშიც მონაწილეობა ქართულ-ამერიკული სკოლის VI და VII კლასის მოსწავლეებმა მიიღეს. ბავშვებმა წარმოადგინეს საკუთარი ნამუშევრები, რომლებიც გამოხატავდა მათ ხედვას ნარჩენებით დაბინძურების პრობლემისა და მისი გადაჭრის გზების შესახებ.
ღონისძიება გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა და გარემოსდაცვითი ინფორმაციისა და განათლების ცენტრის დირექტორის მოვალეობის შემსრულებელმა მარიამ გორგაძემ გახსნეს.
როგორც გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა სიტყვით გამოსვლის დროს განაცხადა, გარემოს დაცვის მსოფლიო დღე კიდევ ერთხელ გვახსენებს, რამდენად მნიშვნელოვანია თითოეული ადამიანის ჩართულობა გარემოს დაცვის პროცესში.
„განსაკუთრებით აღსანიშნავია ის მნიშვნელოვანი წვლილი, რომელიც საქართველოს მთავრობასა და გარემოსდაცვითი ინფორმაციისა და განათლების ცენტრს მიუძღვით. სწორედ მათი მხარდაჭერით ხორციელდება ქმედითი პროექტები, რომლებიც ხელს უწყობს საზოგადოების ცნობიერების ამაღლებასა და გარემოსადმი პასუხისმგებლობით განსჭვალული თაობების აღზრდას“, - განაცხადა სოლომონ პავლიაშვილმა.
ღონისძიებაზე მნიშვნელოვანი აქცენტი გაკეთდა გარემოსდაცვითი ინფორმაციისა და განათლების ცენტრის როლზე. ცენტრის დირექტორის მოადგილემ, მარიამ გორგაძემ აღნიშნა, რომ ცენტრი წარმოადგენს ქვეყნის ერთ-ერთ ძირითად პლატფორმას გარემოსდაცვითი განათლების კუთხით.
„გარემოსდაცვითი ინფორმაციისა და განათლების ცენტრი ახორციელებს როგორც საინფორმაციო კამპანიებს, ისე პრაქტიკულ-საგანმანათლებლო პროგრამებს სკოლებისთვის, სტუდენტებისთვისა და ფართო საზოგადოებისათვის. დღეს ასეთ ფორმატში გარემოს დაცვის მსოფლიო დღის აღნიშვნა სწორედ იმ თანამშრომლობის შედეგია, რაც სამინისტროს, სკოლებსა და არასამთავრობო სექტორს შორის არსებობს“, - აღნიშნა მარიამ გორგაძემ.
გარემოს დაცვისა და სოფლის მეურნეობის სამინისტროს სისტემაში შემავალი უწყებების მიერ, გარემოს დაცვის მსოფლიო დღის აღსანიშნავად, არაერთი ღონისძიება ჩატარდა. ეროვნულმა სატყეო სააგენტომ, მოხალისეობრივი პლატფორმა „ტყის მეგობრის“ ფარგლებში, ჯვრის მონასტრის მიმდებარე ტერიტორიაზე დასუფთავების მასშტაბური აქცია გამართა; ლაგოდეხში, დაცული ტერიტორიების სააგენტომ, შემეცნებით-საგანმანათლებლო პროექტის „ვიცავ ჩემი ქვეყნის ბუნებას“ - დასკვნითი ღონისძიება ჩაატარა. გარემოს ეროვნულმა სააგენტომ გარემოსდაცვის მსოფლიო დღე ბათუმში, წყალში ნარჩენების შემგროვებელი დრონის სადემონსტრაციო ჩვენებით და სანაპიროს დასუფთავების აქციით აღნიშნა.
