კომუნიკაციების კომისიამ ტელეკომპანიების "ტვ პირველისა" და "ფორმულას" წინააღმდეგ ქართული ოცნების საჩივარი წარმოებაში მიიღო. დავის არსებითი განხილვა 19 ივნისს, 15:00 საათზე გაიმართება.
"ქართულმა ოცნებამ" "ტვ პირველსა" და "ფორმულას" "მაუწყებლობის შესახებ კანონის" დარღვევის გამო კომუნიკაციების ეროვნულ კომისიაში უჩივლა. "ქართული ოცნება" ტელეკომპანიებს კონკრეტული ტერმინების გამოყენების გამო უჩივის.
საჩივარში აღნიშნულია, რომ "ტვ პირველის" ჟურნალისტს არ უნდა გამოეყენებინა ტერმინები: "რეჟიმი", "გარუსება", "კლანის სასამართლო", "არალეგიტიმური ხელისუფლება", "რუსული კომისიის სხდომა" და ა.შ.
"ფორმულას" ცნობით, საჩივარი შეეხება არხის მიერ ისეთი ტერმინების გამოყენებას, როგორიცაა: "არალეგიტიმური პარლამენტი", "ე.წ პარლამენტის თავჯდომარე", "ოლიგარქის დეპუტატი", "რეჟიმის საქალაქო სასამართლო", "ქართული ოცნების რეჟიმი", "რეჟიმის პატიმარი", ასევე ბიძინა ივანიშვილის "ოლიგარქად" მოხსენიებას.
