გამოცემა Axios-ი წყაროებზე დაყრდნობით წერს, რომ აშშ-ის პრეზიდენტი დონალდ ტრამპი სპეცოპერაცია „ობობის ქსელს“, რომლის დროსაც რუსული სტრატეგიული ავიაციის თვითმფრინავები განადგურდა, „ძლიერს“ და „მაგარს“ უწოდებს.
ამავდროულად, გამოცემის წყაროების ცნობით, ამერიკის პრეზიდენტი შეშფოთებულია, რომ ეს კიდევ უფრო გაართულებს მის მისიას ცეცხლის შეწყვეტის თაობაზე.
პორტალი აღნიშნავს, რომ ტრამპი საჯაროდ გასაკვირი თავშეკავებით იქცეოდა, როდესაც საუბარი უკრაინის თავდასხმაზე დაკავშირებით მის პირად ემოციებს შეეხებოდა.
თუმცა, პირად საუბარში ის აღფრთოვანებული იყო ოპერაციით. „საკმაოდ ძლიერია“, - უთხრა ტრამპმა ერთ-ერთ თავის ნდობით აღჭურვილ პირს, რომელმაც მისი სიტყვები Axios-ს გადასცა.
„მისი აზრით, ეს მაგარია, - თქვა მეორე წყარომ ტრამპის რეაქციის შესახებ.
ტრამპის ერთ-ერთმა მრჩეველმა თქვა: „საერთაშორისო პერსპექტივიდან, თქვენ გყავთ ჩიხუახუა, რომელიც რეალურ ზიანს აყენებს გაცილებით დიდ ძაღლს“.
ამავდროულად, ტრამპმა ასევე უთხრა იმ პირებს, ვისაც ბოლო დღეებში შეხვდა, რომ დრონებით თავდასხმა, სავარაუდოდ, ვლადიმირ პუტინს, ძალიან მკაცრი საპასუხო ზომების მიღებას აიძულებს, განაცხადა საკითხთან დაკავშირებულმა სხვა პირმა.
წყაროს ცნობით, ტრამპი შეშფოთებულია, რომ ეს სცენარი შეაფერხებს მის დიპლომატიურ ინიციატივას, რამაც გამოიწვია უკრაინასა და რუსეთს შორის სამი წლის განმავლობაში პირველი პირდაპირი მოლაპარაკებები.
„ჩვენ გვსურს, რომ ეს ომი დასრულდეს. ჩვენ გვსურს, რომ მისი დეესკალაცია მოხდეს. ამიტომ, თუ პუტინი ამის გამო გაბრაზდება, მაშინ დიახ, პრეზიდენტი შეშფოთებული იქნება“, - განაცხადა კიდევ ერთმა წყარომ, რომელიც ტრამპს ესაუბრა.
ერთ-ერთი მიზეზი, რის გამოც თეთრი სახლი შეშფოთებული იყო უკრაინის თავდასხმის გამო, ის იყო, რომ ის მიმართული იყო სტრატეგიული ბომბდამშენების წინააღმდეგ, რომლებსაც შეუძლიათ ბირთვული იარაღის ტარება და რუსეთის ბირთვული შეკავების ძირითად ელემენტს წარმოადგენს.
„ეს ძალიან სახიფათო მომენტია“, - განაცხადა აშშ-ის ოფიციალურმა პირმა. წყაროს თქმით, ტრამპი არ გაკვირვებულა, რომ უკრაინელებმა თავდასხმა განახორციელეს, „რადგან ეს ხდება მაშინ, როდესაც ომი მიმდინარეობს“.
„თუმცა, ის შეშფოთებულია, რომ ეს ბრძოლას გაახანგრძლივებს. მას სურს, რომ საბრძოლო მოქმედებები შეწყდეს, ამიტომ ყოველ ჯერზე, როცა ასეთი თავდასხმა ხდება, იმედგაცრუებული რჩება“, - განაცხადა თეთრი სახლის მაღალჩინოსანმა. წყაროს თქმით, ამ შეშფოთების მიუხედავად, ტრამპიც გაოცებული იყო უკრაინელების ქმედებებით.
