დიდი ბრიტანეთის, საფრანგეთისა და კანადის ლიდერები მოითხოვენ, რომ ისრაელმა შეწყვიტოს ღაზის სექტორში ახალი შეტევა, წინააღმდეგ შემთხვევაში მას სანქციები დაეკისრება.
ამის შესახებ ნათქვამია დიდი ბრიტანეთის, საფრანგეთისა და კანადის ლიდერების ერთობლივ განცხადებაში, რომელიც ბრიტანეთის მთავრობის ვებგვერდზე გამოქვეყნდა.
„ჩვენ კატეგორიულად ვეწინააღმდეგებით ისრაელის სამხედრო ოპერაციების გაფართოებას ღაზაში. ღაზაში ადამიანური ტანჯვის დონე აუტანელია. გუშინდელი განცხადება, რომ ისრაელი ღაზაში საკვების საბაზისო მარაგის შეტანის ნებართვას გასცემს, სრულიად არაადეკვატურია. ჩვენ მოვუწოდებთ ისრაელის მთავრობას, შეწყვიტოს სამხედრო ოპერაციები ღაზაში და დაუყოვნებლივ დაუშვას ჰუმანიტარული დახმარება ღაზის სექტორში“, - აღნიშნულია განცხადებაში.
სამი ქვეყნის წარმომადგენლებმა ასევე მოუწოდეს ჰამასს, „დაუყოვნებლივ გაათავისუფლოს დარჩენილი მძევლები, რომლებსაც ისინი ასე სასტიკად აკავებენ [2023 წლის] 7 ოქტომბრიდან“
დიდმა ბრიტანეთმა, საფრანგეთმა და კანადამ აღნშინეს, რომ ისრაელმა 2023 წლის 7 ოქტომბერს საშინელი თავდასხმა განიცადა და რომ ისინი „ყოველთვის უჭერდნენ მხარს“ მის უფლებას, „დაეცვა ისრაელელები ტერორიზმისგან“, თუმცა ისრაელის თავდაცვის ძალების ახალ შეტევას „სრულიად არაპროპორციული ესკალაცია“ უწოდეს.
„ჩვენ ვერ ვიდგებით განზე, ვიდრე ნეთანიაჰუს მთავრობა აგრძელებს ამ აღმაშფოთებელ ქმედებებს. თუ ისრაელი არ შეწყვეტს განახლებულ სამხედრო შეტევას და არ მოხსნის ჰუმანიტარულ დახმარებაზე შეზღუდვებს, ჩვენ მივიღებთ შემდგომ კონკრეტულ საპასუხო ზომებს“, - ნათქვამია განცხადებაში.
დიდი ბრიტანეთი, საფრანგეთი და კანადა ასევე ეწინააღმდეგებიან დასავლეთ სანაპიროზე დასახლებების გაფართოების ნებისმიერ მცდელობას.
ამ ქმედებას უკანონო უწოდეს, მათი განცხადებით, ეს „ძირს უთხრის პალესტინის სახელმწიფოს სიცოცხლისუნარიანობას და როგორც ისრაელელების, ასევე პალესტინელების უსაფრთხოებას“.
„ჩვენ უყოყმანოდ მივიღებთ დამატებით ზომებს, მათ შორის მიზანმიმართულ სანქციებს“, - ნათქვამია განცხადებაში.
19 მაისს ცნობილი გახდა, რომ ისრაელის არმიამ ღაზაში ფართომასშტაბიანი შეტევის დაწყების შესახებ გამოაცხადა, რომლის მიზანია ღაზის სექტორზე სრული კონტროლის დამუარება
სამხედროების მიერ ახალი სახმელეთო ოპერაციის გამოცხადებიდან რამდენიმე საათში, პრემიერ-მინისტრ ბენიამინ ნეთანიაჰუს ადმინისტრაციამ განაცხადა, რომ „ისრაელი მოსახლეობისთვის საბაზისო საკვების მარაგის შეტანის ნებართვას გასცემს, რათა თავიდან აიცილოს ღაზის სექტორში შიმშილობით გამოწვეული კრიზისის განვითარება“.
ამის შემდეგ, ევროპის რიგმა ქვეყნებმა, რომლებიც ღაზის სექტორში მშვიდობიანი მოსახლეობისთვის ჰუმანიტარულ დახმარებას აფინანსებენ, ისრაელს მოუწოდეს, მოხსნას ყველა დაბრკოლება საკვები პროდუქტის რეგიონში მიწოდებისთვის.
