სასჯელაღსრულების, პრობაციისა და იურიდიული დახმარების საკითხთა მინისტრი დიმიტრი შაშკინი სადაზღვევო კომპანია "არქიმედე გლობალ ჯორჯიას" ესტუმრა, სადაც პრობაციის ეროვნული სამსახურის ხელშეწყობით 40 პრობაციონერი დასაქმდა.
ყველა მათგანი საცხოვრებელი ადგილის მიხედვით სხვადასხვა რეგიონულ ოფისში იმუშავებს. საწყის ეტაპზე პირობით მსჯავრდებულებს სპეციალური ტრენინგი ჩაუტარდებათ. პრობაციონერები, რომლებიც დაკისრებულ მოვალეობას თავს წარმატებით გაართმევენ, სადაზღვევო კომპანიის მუდმივი თანამშრომლები გახდებიან.
არასაპატიმრო სასჯელთა აღსრულებისა და პრობაციის ეროვნული სამსახურის შუამდგომლობით, არაერთი პრობაციონერი როგორც თბილისში, ასევე საქართველოს სხვადასხვა რეგიონში უკვე დასაქმდა. სასჯელაღსრულების, პრობაციისა და იურიდიული დახმარების საკითხთა სამინისტრო იმედოვნებს, რომ პრობაციონერთა დასაქმების სურვილს სხვა კომპანიებიც გამოთქვამენ, რადგან პირობით მსჯავრდებულთა დასაქმება არა მხოლოდ პრობაციონერების ფინანსური მდგომარეობის გაუმჯობესებას, არამედ დანაშაულის პრევენციას უწყობს ხელს, რაც საზოგადოების უსაფრთხოების საუკეთესო გარანტია.
