საქართველოს საგარეო საქმეთა სამინისტროს ინფორმაციით, პრაღაში, კარლის უნივერსიტეტის ტერიტორიაზე სროლის შედეგად დაშავებულთა შორის საქართველოს მოქალაქეების შესახებ ინფორმაცია არ გავრცელებულა.
„საქართველოს საელჩო ჩეხეთის რესპუბლიკაში ინფორმირებულია ინციდენტის შესახებ, კავშირზეა ჩეხეთის შესაბამის სტრუქტურებთან. საქრთველოს მოქალაქეების დაშავების შესახებ ინფორმაცია ჯერ არ არის“,- აღნიშნულია საგარეო უწყების ინფორმაციაში.
მედიის ინფორმაციით, პრაღაში, უნივერსიტეტში სროლის შედეგად დაღუპულია ათი ადამიანი, დაშავებულთა რაოდენობა კი 30-ს აღწევს.
თავდამსხმელი განეიტრალებულია.
შეიარაღებულმა პირმა პრაღის ცენტრში, იან პალახის მოედანზე მდებარე უნივერსიტეტში ცეცხლი გახსნა.
უნივერსიტეტის შენობიდან ხალხის ევაკუაცია განხორციელდა, მოედანი და მისი მიმდებარე ქუჩები გადაკეტილია. ადგილზე საგანგებო სამსახურები მუშაობენ.
პოლიცია მოსახლეობას სახლში დარჩენისკენ მოუწოდებს.
