უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა არ აპატიებს რუსეთს სრულმასშტაბიან, აგრესიულ, სასტიკ ომს.
„რუსეთის პატიება არავის უნდა. არავინ აპატიებს მას. და, რა თქმა უნდა, უკრაინის ოკუპაციას ვერ შეძლებენ, რადგან მათ დაწვავენ ჩვენს სახლებში, თუ იქ შევლენ, დაიკავებენ და იცხოვრებენ. რა თქმა უნდა, ეს არის მომენტი, როდესაც უკან არ დავბრუნდებით, რადგან მათ ამდენი ადამიანი მოკლეს და ყველა ოჯახში გვაქვს დანაკარგი“, - აღნიშნა ზელენსკიმ.
ზელენსკი დარწმუნებულია, რომ რუსი ოკუპანტები ვერ შეძლებენ თავიანთი მიზნების მიღწევას უკრაინაში. ამასთან, პრეზიდენტმა აღნიშნა, რომ გარკვეული ნაბიჯები უნდა გადაიდგას ომის დასასრულებლად.
"რა თქმა უნდა, ჩვენ გვინდა დავასრულოთ ისე, რომ ის კვლავ თავიდან არ დაიწყოს. ჩვენ გვჭირდება უსაფრთხოების კონკრეტული გარანტიები", - თქვა ზელენსკიმ და დასძინა, რომ ეს შეიძლება იყოს სამართლებრივი გარანტიები ან უკრაინისთვის იარაღის მიწოდება, რომლითაც შესაძლებელი იქნება რუსეთის შეჩერება.
მისი თქმით, ომის დროს უკრაინელები მხოლოდ ერთი სურვილით ცხოვრობენ: რომ დასრულდეს ეს ომი, მშვიდობიანად იცხოვრონ თავიანთ მიწაზე და რუსები აღარასოდეს შეიჭრან უკრაინაში.
ამასთან, ზელენსკიმ აღნიშნა, რომ რუსეთის პრეზიდენტს ვლადიმირ პუტინს არ სჭირდება მშვიდობა, რადგან მას არ აინტერესებს დამოუკიდებელი უკრაინა, მას ის სჭირდება მხოლოდ როგორც ნაწილი და ანკლავი რუსეთის ფედერაციის შემადგენლობაში.
