შოვის სტიქიას გადარჩენილი მარიამ ბერიანიძე ტრაგედიის დღეს ტვ პირველ;ის ეთერში იხსენებს.
"ვიყავით ჩემი ოჯახი, ჯელაძეების 10-სულიანი ოჯახი და პაპა, რომელიც სახლიანად ჩამოიტანა მეწყერმა. ბაბუ გადარჩა, მაგრამ მისი მეუღლე დაკარგულია," - ამბობს ის იგა გრიგოლას გადაცემაში „დღის ამბები“.
ბერიანიძის თქმით, მეუღლე და ორი წლის შვილი 2 საათის განმავლობაში იყვნენ მეწყერში ჩაფლული. ბერიანიძე ამბობს, რომ მეწყერში მოყოლილები რაჭველმა ბიჭებმა გადაარჩინეს.
„წარმომიდგენია, ბოლო ფიქრები რა გამოიარეს, ვერც ერთი სიტყვა და ფოტო-ვიდეომასალა ვერ აღწერს იმ ჯოჯოხეთს, რაც ჩვენ იქ ვნახეთ, ეს რაღაც სასაწაულია, რომ გადავრჩით, არ გვქონდა შანსი გადარჩენის," - ამბობს ბერიანიძე.
ბერიანიძის თქმით, ღვარცოფი რამდენიმე ტალღად მოდიოდა და მეწყერში მოყოლილებს გადაადგილების შესაძლებლობა, ფაქტობრივად, არ ჰქონდათ.
„ფაქტობრივად, ვიყავით იმ მთის ძირში, რომელიც მთლიანად მოწყდა. გავიგეთ საშინელი ხმაური, გვეგონა, ვერტმფრენი დაფრინავდა, რამდენიმე ხე რომ წაიქცა, მივხვდით, რომ ჩვენკენ მოდიოდა არა მხოლოდ ხეები, არამედ მთლიანი მთის მასა. მეუღლემ აიტაცა ბავშვი ხელში და გავიქეცით ქვემოთ. მახსოვს, რომ მე დავეცი და ერთი წამის ამბავი იყო, რომ უკან გავიხედე და დავინახე, რომ მთა მოგვდევდა, ფაქტობრივად. გავრბოდით კალცის წყალზე, იქ იყო ხიდი, პირველმა ნაკადმა იქაურობა გაანადგურა, მეორე ტალღა უფრო უარესი წამოვიდა, დაახლოებით, 25 მეტრის იყო, გადაუარა იქაურობას და მთლიანად წალეკა. ჩვენც გადაგვიარა, დაგვეტაკა მეწყერის უზარმაზარი ტალღა და ჩაგვითრია. გასაქცევი არსად იყო, ფიქრის საშუალებაც არ გვქონდა, რომ სადმე გასაქცევი გვეშოვა. კილომეტრებზე მოდიოდა ღვარცოფი და არ გვქონდა ადგილი, რომ გავქცეულიყავით. რაღაცნაირად მოვახერხეთ, პატარა კუნძულივით გაკეთებულ ადგილზე ასვლა და ერთი ნაბიჯით ავცდით, რომ მესამე ტალღამ არ დაგვარტყა. წამოვიდა შემდეგი ტალღები, მეოთხე და მეხუთე ტალღა წამოვიდა, მაგრამ მდინარის კალაპოტისკენ წავიდა. ვლოცულობდით, რომ გთხოვ, გაიტანე, რომ რამენაირად წაეღო და ჩვენკენ აღარ გადმოსულიყო ეს ღვარცოფი. განწირულები ვყვიროდით, არ ვიცოდით, რა უნდა გაგვეკეთებინა. ჯერ კიდევ რომ ვიბრძოდით გადასარჩენად, დავრეკეთ 112-ში... ვიყავით ჩემი ოჯახი, ხელაძეების 10-სულიანი ოჯახი და პაპა, როლმელიც სახლიანად ჩამოიტანა მეწყერმა," - იხსენებს მარიამ ბერიანიძე.
ბერიანიძის თქმით, რამდენიმე ადამიანი მის თვალწინ მეწყერმა გაიტაცა.
„დავინახე ახალგაზრდა წყვილი, რომელიც ხეზე აძვრა თავის გადასარჩენად და საბოლოოდ, ხიანად მოგლიჯა და წაიღო მეწყერმა რამდენიმე მანქანასთან ერთად. ასევე წყვილი, რომლებმაც მანქანიდან გადმოსვლა ვერ მოახერხეს და მანქანიანად წაიღო და ერთი ქალი, რომელიც იჯდა კალცის წყაროსთან. დანარჩენი შეიძლება ჩვენმა გონებამ ვერ აღიქვა, იმიტომ, რომ წამებში ხდებოდა ის, რომ ჩვენ უნდა გავქცეულიყავით, რომ თავისთვის გვეშველა, მანქანის ფერიც კი არ მახსოვს, მოდელზე საუბარი ზედმეტია," - ამბობს ბერიანიძე.
