პარლამენტის შენობასთან ჭიათურელმა მაღაროელებმა საპროტესტო აქცია გამართეს.
ადგილზე შეკრებილები იყვნენ სამოქალაქო აქტივისტებიც, რომლებიც მაღაროელებს სოლიდარობას უცხადებდნენ.
მათი მოთხოვნა ხელფასის 40%-ით გაზრდაა. დასაქმებულები ამბობენ, რომ ვიდრე მათი მოთხოვნები სრულად არ დაკმაყოფილდება, პროტესტი გაგრძელდება.
10 მაღაროელი მერვე დღეა შიმშილობს, გუშინ ერთ-ერთმა მათგანმა თვალები ამოიკერა, კიდევ ერთმა მოქალაქემ კი თვითდაზიანება მიიყენა და ვენები გადაიჭრა. მანამდე პროტესტის კიდევ ერთმა მონაწილემ პირი ამოიკერა.
"ჯორჯიან მანგანეზმა" განცხადება გაავრცელა და თქვა, რომ კომპანია მზადაა, დასაქმებულთა მოთხოვნის შესაბამისად, მუშაობა ძველი სამუშაო გრაფიკით განაახლოს და ხელფასები 5%-ით გაზარდოს. თუმცა მაღაროელები ამ პირობას არ ეთანხმებიან. ისინი მორიგ აქციას პარლამენტთან 20 ივნისს გამართავენ.
