მოძრაობის „საქართველო უპირველეს ყოვლისა“ წარმომადგენლები „ფრანკლინის კლუბის“ ორი წლის საიუბილეო ღონისძიების გასაპროტესტებლად მივიდნენ. ღონისძიება „კოკა-კოლას“ ყოფილი საწარმოს ტერიტორიაზე მიმდინარეობდა.
რადიკალური მოძრაობის ერთ-ერთი დამფუძნებლის, ვატო შაქარიშვილის თქმით, აღნიშნული ორგანიზაცია ანტისახელმწიფოებრივი საქმიანობის პროპაგანდას ეწევა, რაც, მისი თქმით, საზოგადოების ნაწილისთვის მიუღებელია.
„ყოველთვის დავაფიქსირებთ ჩვენს მოსაზრებას მკაფიოდ, რომ ამ ქვეყანაში ვერ განხორციელდება რევოლუციური სცენარები, ვერ გამოიყენებენ ჩვენს ახალგაზრდებს, ვის იდეოლოგიურ მოწამვლასაც ისინი ცდილობენ. გავაპროტესტებთ ამ კოლაბორაციას, რომელიც შედგა, ერთის მხრივ „მაკდონალდსა“ და „ფრანკლინის კლუბს“ შორის იმ ფონზე, როდესაც „მაკდონალდსმა“ წინა კვირას უკადრებელი იკადრა, სცადა ჩვენს ბავშვებზე ლგბტ პროპაგანდის თავს მოხვევა. ამაზე გვქონდა რეაცქია. ჩვენ ვემორჩილებით სამართალდამცავების მოთხოვნებსა და მითითებებს. ჩვენი პროტესტი არის მშვიდობიანი“,- განაცხადა შაქარიშვილმა.
ადგილზე სამართალდამცველები იყვნენ მობილიზებული.
მოგვიანებით რადიკალური მოძრაობის წარმომადგენლებმა ტერიტორია დატოვეს.
"ფრანკლინის კლუბის" 2-წლის იუბილესადმი მიძღვნილი ღონისძიება მშვიდ ვითარებაში ჩატარდა.
