აქონდროპლაზიის სინდრომის მქონე ბავშვებისა და მათი მშობლების სოლიდარობის აქცია პარლამენტთან გრძელდება. აქციის მონაწილეებმა საკანონმდებლო ორგანოსთან კანცელარიის ტერიტორიიდან გადაინაცვლეს. აქციაზე იმყოფებიან საზოგადოებისთვის ცნობილი სახეები, სამოქალაქო აქტივისტები, სტუდენტები და რიგითი მოქალაქეები.
აქციის მონაწილეების თქმით, ვიდრე ოფიციალური დოკუმენტი არ იქნება ხელმოწერილი, რომ კონკრეტულ რიცხვში შემოვა წამალი, მანამდე აქციები გაგრძელდება.
უკვე 2 კვირაა იშვიათი გენეტიკური დაავადების მქონე ბავშვების დედები და ოჯახის წევრები მთავრობის ადმინისტრაციასთან უწყვეტ აქციას მართავენ და აქონდროპლაზიის სინდრომის მქონე ბავშვებისთვის საჭირო მედიკამენტის - "ვოზორიტიდის" შემოტანას ითხოვენ.
აქციის პარალელურად ცნობილი გახდა ჯანდაცვის სამინისტროს გადაწყვეტილების შესახებ, რომლის თანახმადაც, ორგანიზაციის „პატარა ადამიანები საქართველოდან“ წარმომადგენლებს შესაძლებლობა ექნებათ, ჩაერთონ როგორც იშვიათი დაავადებების საკითხებზე მომუშავე საკოორდინაციო საბჭოს, ისე აქონდროპლაზიის საკითხებზე მომუშავე მულტიდისციპლინური ჯგუფის მუშაობაში. სამუშაო ჯგუფში ჩართვა მშობლების ერთ-ერთი მოთხოვნა იყო.
26 აპრილს გაიმართა იშვიათი დაავადებების, მათ შორის აქონდროპლაზიის საკითხებზე მომუშავე საკოორდინაციო საბჭოს შეხვედრა. მისი დასრულების შემდეგ ჯანდაცვის მინისტრის მოადგილემ, თამარ გაბუნიამ განაცხადა: „ვფიქრობთ, რამდენიმე კვირის განმავლობაში ექსპერტებთან ერთად მეტი სიცხადე გვექნება, რა გზას უნდა მივმართოთ მედიკამენტთან დაკავშირებით“.
ჯანდაცვის ორგანიზაციის საქართველოს ოფისის წარმომადგენელმა სილვიუ დომენტემ განაცხადა, რომ პრეპარატის დასამტკიცებლად რამდენიმე გადაწყვეტილებაა მისაღები და ეს რთული პროცესია.
